T20 World Cup 2026 : टी-20 विश्वचषक 2024 चे आयोजन अमेरिका आणि वेस्ट इंडिजमध्ये होत आहे. टी-20 विश्वचषक स्पर्धेतील सुपर 8 सामने 19 जूनपासून खेळवले जाणार आहेत. आठ संघ सुपर 8 फेरीसाठी पात्र ठरले आहेत. यासह एकूण 12 संघ पुढील टी-20 विश्वचषकासाठी पात्र ठरले आहेत.

टी-20 विश्वचषक 2026 भारत आणि श्रीलंकेत आयोजित केला जाणार आहे. यंदाच्या मोसमात ज्या फॉरमॅटमध्ये वर्ल्डकप आयोजित करण्यात आला होता त्याच फॉरमॅटमध्ये हा वर्ल्ड कपही आयोजित केला जाईल. विश्वचषक स्पर्धेत एकूण 20 संघ सहभागी होणार आहेत. या संघांचीही चार गटात विभागणी करण्यात येणार आहे.

‘हे’ संघ टी-20 विश्वचषक 2026 स्पर्धेसाठी ठरले पात्र… 

20 संघांपैकी 12 संघ 2026 च्या विश्वचषकासाठी पात्र ठरले आहेत. यामध्ये यजमान भारत आणि श्रीलंका हे दोन संघ आहेत. टीम इंडिया सुपर एटमध्ये पोहोचली असून श्रीलंका संघाचा प्रवास ग्रुप स्टेजमध्येच संपला. तसेच, सुपर-8 मध्ये समाविष्ट असलेले इतर संघ 2024 च्या टी-20 विश्वचषकासाठी पात्र ठरले आहेत. याशिवाय, आयसीसीसी टी-20 रँकिंगच्या आधारे सर्वोत्कृष्ट तीन संघांना 2026 च्या विश्वचषकाची तिकिटे मिळतील. उर्वरित आठ स्थानांचा निर्णय आयसीसी प्रादेशिक(रिजनल) पात्रता फेरीतून होईल. अशा स्थितीत भारत आणि श्रीलंकेव्यतिरिक्त अफगाणिस्तान, दक्षिण आफ्रिका, ऑस्ट्रेलिया, अमेरिका, बांगलादेश, वेस्ट इंडिज, इंग्लंड, आयर्लंड, न्यूझीलंड आणि पाकिस्तान 2026 च्या विश्वचषकासाठी पात्र ठरले आहेत.

‘या’ संघांना लागली लॉटरी…

टी-20 विश्वचषक 2026 साठी पात्र ठरलेल्या 12 संघांमध्ये असे तीन संघ आहेत ज्यांना लॉटरी लागली आहे. हे संघ दुसरे कोणी नसून आयर्लंड, न्यूझीलंड आणि पाकिस्तान आहेत. या संघांनी 2024 च्या टी-20 विश्वचषक स्पर्धेत चांगली कामगिरी केली नाही, परंतु तरीही क्रमवारीच्या आधारावर ते 2026 च्या टी-20 विश्वचषकासाठी पात्र ठरले. न्यूझीलंडची आयसीसी टी-20 रँकिंग 06 आहे, पाकिस्तानची आयसीसी टी-20 रँकिंग 07 आहे आणि आयर्लंडची आयसीसी टी-20 रँकिंग 11 आहे. अशा परिस्थितीत, या संघांचे नशीब चांगले होते की त्यांची आयसीसी क्रमवारी पूर्वीपेक्षा चांगली होती ज्यामुळे त्यांना 2026 च्या विश्वचषकासाठी आपले स्थान निश्चित करता आले.

T20 World Cup 2024 : आठ संघांमध्ये होणार 12 सामने..! सुपर-8 मध्ये कोण-कोणाशी अन् कधी भिडणार, जाणून घ्या संपूर्ण वेळापत्रक…

दुसरीकडे, अमेरिका सुपर 8 मध्ये गेल्याने स्कॉटलंड संघाचे मोठे नुकसान झाले आहे. स्कॉटलंड संघ आयसीसी क्रमवारीच्या आधारे (12 वा क्रमांक) 2026 च्या विश्वचषक स्पर्धेसाठी पात्र ठरू शकला नाही आणि 17 व्या क्रमांकावर असलेल्या अमेरिका संघाने आपले स्थान निश्चित केले.