मुंबई – दाक्षिणात्य अभिनेता नानी व अभिनेत्री किर्ती सुरेशच्या ‘दसरा’ चित्रपटाला प्रेक्षकांचा मोठा प्रतिसाद मिळाला. 30 मार्च रोजी हा चित्रपट रिलीज झाला होता. विशेष म्हणजे अभिनेता अजय देवगणचा ‘भोला’ हा चित्रपटही याच दिवशी थिएटरमध्ये प्रदर्शित झाला होत. मात्र पहिल्याच दिवशी दसरा या चित्रपटाने धुमाकूळ घालायला सुरुवात केली होती. कमाईच्या बाबतीत दसरा अजय देवगनच्या भोलावर वरचढ ठरताना दिसला. या चित्रपटाने अवघ्या सहा दिवसांत 100 कोटींची कमाई केली.

नानीच्या ‘दसरा’ने प्रदर्शनाच्या दिवशी 17 कोटींची कमाई केली होती. तर भोलाला पहिल्या दिवशी अकरा कोटींपर्यंतच मजल मारता आली होती. 65 कोटींचं बजेट असलेल्या या चित्रपटाने बॉक्स ऑफिसवर 100 कोटींचा आकडा पार केला आहे. बॉक्स ऑफिसवर जबरदस्त कमाई करणारा ‘दसरा’ आता ओटीटीवर प्रदर्शित होण्यास सज्ज झाला आहे.

‘दसरा’ येत्या 27  एप्रिलपासून नेटफ्लिक्स या ओटीटी प्लॅटफॉर्मवर पाहता येणार आहे. नेटफ्लिक्स इंडिया साऊथच्या सोशल मीडिया अकाऊंटवरुन ही माहिती देण्यात आली आहे. हा चित्रपट नेटफ्लिक्सवर तेलुगू, तमिळ, मल्याळम आणि कन्नड या भाषांमध्ये प्रदर्शित होणार आहे.

दसरा चित्रपटात नानीसोबत अभिनेत्री कीर्ती सुरेश, समुथिराकनी आणि शाइन टॉम चाको हे कलाकार मुख्य भूमिकेत आहेत. दसरा या चित्रपटाचे दिग्दर्शन श्रीकांत उडेला यांनी केले आहे. नानीने याआधी अनेक चित्रपट केले आहेत, ज्याद्वारे तिने तेलुगू चित्रपटसृष्टीत जबरदस्त फॅन फॉलोइंग मिळवले आहे. 2008 मध्ये प्रदर्शित झालेला ‘अष्ट चम्मा’ हा त्याचा पहिला चित्रपट होता. राजामौली यांच्या ‘मक्खी’ चित्रपटाने त्याला घराघरात पोहचवले होते.