कोपरगाव – कोपरगाव शहराच्या हद्दवाढ झालेल्या उपनगरातील नागरिकांना सर्व प्रकारच्या मुलभूत सोयी सुविधा उपलब्ध व्हाव्यात, यासाठी निधी मिळावा, याबाबत केलेल्या पाठपुराव्याची दखल घेऊन महायुती शासनाने कोपरगाव शहराच्या हद्दवाढ झालेल्या उपनगरांच्या विकासासाठी स्वतंत्र 10 कोटी निधी मंजूर केला असल्याची माहिती आ. आशुतोष काळे यांनी दिली आहे.

कोपरगाव शहराचा विस्तार दिवसेंदिवस वाढत असल्यामुळे कोपरगाव शहराच्या लगत अनेक छोटी-मोठी उपनगरे वसलेली आहेत. या उपनगरातील नागरिकांना शहरातील नागरिकांना दिल्या जाणाऱ्या रस्ते, पाणी, वीज, आरोग्य, भूमिगत गटारी आदी सुविधा मिळणे गरजेचे होते. ज्याप्रमाणे मागील साडे तीनवर्षात कोपरगाव शहराचा विकास झाला, त्याप्रमाणेच या उपनगरांचा देखील सर्वांगीण विकास होवून नागरिकांना सर्व मुलभूत सोयी सुविधा मिळाव्यात अशी नागरिकांची मागणी होती. त्याबाबत या उपनगरांच्या विकासासाठी निधी मिळावा याबाबत सातत्याने पाठपुरावा करीत होतो. त्या पाठपुराव्याला अखेर यश आले आहे.

शासनाने कोपरगाव शहराच्या लगत हद्दवाढ झालेल्या भागात वसलेल्या नाईकनगर, सह्याद्री कॉलनी, द्वारका नगरी, सोसायटी, गोकुळ नगरी, शंकर नगर मागील पवार वस्ती, ओम नगर, गवारे नगर, गवारे वस्ती, अयोध्या नगरी, धोंडीबा नगर, हनुमान नगर, पवार वस्ती आदी उपनगरांसाठी तसेच हद्दवाढ झालेल्या इतर भागाच्या विकासासाठी स्वतंत्र 10 कोटी निधी मंजूर केला आहे. ज्याप्रमाणे कोपरगाव शहरातील रस्ते, पाणी, वीज,आरोग्य, शहर सुशोभिकरण, भूमिगत गटारी आदी महत्वाचे प्रश्न सुटले आहेत. त्याप्रमाणे कोपरगाव शहराच्या हद्दवाढ झालेल्या उपनगरांच्या विकासाचा देखील प्रश्न मार्गी लागला आहे. उपनगरांच्या विकासासाठी अधिक निधी आणण्यासाठी प्रयत्नशील असल्याचे आ. आशुतोष काळे यांनी सांगितले. राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री तथा अर्थमंत्री अजित पवार यांचे आभार मानले आहे.