Aanchal Khurana: मुंबईत स्वतःचं घर असणं हे अनेक कलाकारांचं स्वप्न असतं. मात्र, मनोरंजन क्षेत्रात अनेक वर्षे काम करूनही हे स्वप्न पूर्ण करणं प्रत्येकासाठी सोपं नसतं. अभिनेत्री आणि रोडीज विजेती आंचल खुरानाने नुकताच तिच्या मुंबईतील घराचा टूर चाहत्यांना दाखवला. तिच्या या व्हिडीओमधून अभिनेत्रीच्या आयुष्यातील एक वेगळंच वास्तव समोर आलं आहे. आंचल मुंबईत एका छोट्याशा 1 BHK घरात राहते आणि त्यासाठी दर महिन्याला तब्बल 70 हजार रुपये भाडं देते.

सोशल मीडियावर सेलिब्रिटींचे मोठे आणि आलिशान घरांचे व्हिडीओ अनेकदा पाहायला मिळतात. मात्र, आंचलने दाखवलेलं घर त्यापेक्षा अगदी वेगळं आहे. घर छोटं आहे, जागा कमी आहे आणि खिडकीतून दिसणारा नजारा समुद्र किंवा हिरवाईचा नसून चाळीचा आहे. स्वतःच्या घराबद्दल बोलताना आंचलने महागाई आणि मनोरंजन क्षेत्रातील परिस्थितीवर मिश्कीलपणे भाष्य केलं.

आंचल म्हणाली की, हे तिचं स्वतःचं घर नसून भाड्याचं घर आहे. घर खरेदी करण्यासाठी सध्याची परिस्थिती पाहता अजून बराच काळ वाट पाहावी लागेल. “महागाई आणि इंडस्ट्रीची परिस्थिती पाहता मुंबईत घर घेण्यासाठी अजून 400-500 वर्षं लागतील,” असं ती गंमतीने म्हणाली. या घरासाठी दर महिन्याला 70 हजार रुपये भाडं द्यावं लागत असल्याचंही तिने सांगितलं.

त्यानंतर आंचलने घरातील किचन दाखवलं. तिचं किचन खूपच छोटं असून तिथे अनेक वस्तू ठेवल्यामुळे जागा आणखी कमी झाल्याचं ती सांगते. विशेष म्हणजे याच छोट्याशा किचनमध्ये वॉशिंग मशीनही ठेवण्यात आली आहे.

घराच्या बाहेरचा व्ह्यू दाखवताना आंचलने पुन्हा एकदा परिस्थितीवर विनोद केला. तिच्या घराच्या खिडकीतून मोठ्या चाळीचा परिसर दिसतो. “काय करू शकतो? एवढ्या बजेटमध्ये एवढंच मिळतं,” अशा अर्थाचं वक्तव्य करत तिने हा व्ह्यू चाहत्यांना दाखवला.

आंचलच्या घरात जागा कमी असली तरी तिच्याकडे डिझायनर बॅग्सचा चांगलच कलेक्शन आहे. तिने कपाट दाखवत YSL, Gucci, Michael Kors, Coach आणि Louis Vuitton यांसारख्या ब्रँडच्या बॅग्स दाखवल्या. मात्र, या बॅग्स ठेवण्यासाठी घरात पुरेशी जागा नसल्याचंही तिच्या व्हिडीओमधून दिसून आलं.

तिने बेडरूमसोबतच कपडे आणि बॅग्स ठेवण्यासाठी वापरली जाणारी छोटी खोलीही दाखवली. याच ठिकाणी पूजेसाठी जागा करण्यात आली आहे. घरातील आणखी एका भागात पाहुण्यांसाठी बेड ठेवण्यात आला आहे. मात्र, कपडे वाळत घालण्यासाठीही याच जागेचा वापर होत असल्याचं आंचलने मजेशीरपणे सांगितलं. तिचं घर 13व्या मजल्यावर आहे. घरातील एका छोट्या टेबलला तिने गंमतीने ‘बार’ असंही म्हटलं.

आंचल खुराना ‘MTV Roadies 8’ ची विजेती आहे. त्यानंतर तिने अभिनय क्षेत्रात प्रवेश केला. ‘सपने सुहाने लड़कपन के’, ‘बडे अच्छे लगते हैं’ यांसारख्या मालिकांमध्ये ती दिसली आहे. सध्या ती ‘तू जूलियट जट्ट दी’ या मालिकेत काम करत आहे.

आंचलने यापूर्वीही टीव्ही इंडस्ट्रीतील कलाकारांच्या संघर्षाबद्दल खुलेपणाने भाष्य केलं आहे. कलाकारांना सतत ऑडिशन, तुलना आणि रिजेक्शनचा सामना करावा लागतो, असं तिने सांगितलं होतं. चांगलं ऑडिशन दिल्यानंतरही कधी कधी कमी पैशांमुळे किंवा इतर कारणांमुळे कलाकारांना काम मिळत नाही, असा तिचा अनुभव आहे.

आंचलने कलाकारांच्या आयुष्यातील असुरक्षिततेवरही भाष्य केलं होतं. तिच्या मते, दररोज नवीन आशेने ऑडिशन देणं आणि त्यानंतर रिजेक्शनचा सामना करणं हा या क्षेत्राचा भाग आहे. अशा परिस्थितीत कलाकारांनी कुटुंबाच्या जवळ राहणं आणि कठीण काळात आपल्या जवळच्या व्यक्तींशी बोलणं गरजेचं असल्याचं तिने सांगितलं.

आंचलचा हा घराचा व्हिडीओ केवळ सेलिब्रिटी लाइफची झलक दाखवत नाही, तर मनोरंजन क्षेत्रातील कलाकारांच्या संघर्षाचीही आठवण करून देतो. पडद्यावर दिसणारं ग्लॅमर आणि प्रत्यक्ष आयुष्यातील परिस्थिती यात मोठा फरक असू शकतो, हे तिच्या साध्या घरातून पुन्हा एकदा समोर आलं आहे.