Sanjay Raut – विरोधी पक्षांच्या इंडिया आघाडीत कोणतीही फूट पडलेली नाही, असे ठाकरेसेना नेते संजय राऊत यांनी शनिवारी स्पष्ट केले.

तमिळनाडूमध्ये डीएमकेसोबत युती करून विधानसभा निवडणुका लढवल्या असूनही, काँग्रेसने सरकार स्थापनेसाठी विजय यांच्या नेतृत्वाखालील टीव्हीकेला पाठिंबा दिल्यामुळे आघाडीत दुरावा निर्माण झाल्याच्या चर्चा त्यांनी फेटाळून लावल्या.

डीएमकेने शुक्रवारी लोकसभेतील आपल्या खासदारांच्या आसनव्यवस्थेत बदल करण्याची मागणी केली होती. काँग्रेससोबतची आपली युती संपुष्टात आली असून, आपल्या सदस्यांनी काँग्रेसच्या सदस्यांच्या शेजारी बसणे योग्य ठरणार नाही, असे कारण त्यांनी या मागणीमागे दिले होते.

हे दोन्ही पक्ष इंडिया या आघाडीचे प्रमुख घटक पक्ष आहेत. राऊत म्हणाले की, विरोधी आघाडीत कोणतीही फूट पडलेली नाही. तसेच, लोकसभा निवडणुकांसाठी आम्ही सर्वजण एकत्र असू, असा विश्वासही त्यांनी व्यक्त केला.

डीएमके हा अनेक वर्षांपासून काँग्रेसचा मित्रपक्ष राहिला आहे. इतकेच नव्हे तर, काही काळापूर्वी डीएमके भाजपसोबतही सत्तेत सहभागी होता. टीव्हीकेला पाठिंबा देण्याचा निर्णय घेण्यापूर्वी काँग्रेस नेते राहुल गांधी यांनी डीएमके प्रमुख एम.के. स्टॅलिन यांच्याशी चर्चा केली होती, असे राऊत म्हणाले.