Vasant More: राज्यात सध्या ‘ऑपरेशन टायगर’ची जोरदार चर्चा सुरू असताना शिवसेना (ठाकरे) पक्षाचे पुण्यातील नेते वसंत मोरे यांनी एक मोठा दावा केला आहे. शिंदे गटाकडून आपल्यालाही पक्षात येण्याची ऑफर देण्यात आली होती, असा खुलासा त्यांनी एका वृत्तवाहिनीशी बोलताना केला. मात्र, आपण ती ऑफर नाकारून ठाकरे गटातच राहण्याचा निर्णय घेतल्याचेही त्यांनी स्पष्ट केले.  (Vasant More)

गेल्या काही दिवसांत राज्याच्या राजकारणात मोठ्या घडामोडी घडत आहेत. ठाकरे गटातील काही खासदारांनी शिंदे गटात प्रवेश केला असून, त्यानंतर विधान परिषदेचे आमदार सचिन अहिर यांनीही शिंदे गटाची वाट धरली. त्यामुळे ‘ऑपरेशन टायगर’ अजूनही सुरू असल्याची चर्चा राजकीय वर्तुळात रंगली आहे.  (Vasant More)

याच पार्श्वभूमीवर वसंत मोरे यांनी प्रतिक्रिया देताना सत्ताधाऱ्यांवर टीका केली. ते म्हणाले की, सध्या राज्यात फक्त राजकीय ऑपरेशन्सची चर्चा सुरू आहे. ‘ऑपरेशन टायगर’, ‘ऑपरेशन तुतारी’ किंवा इतर राजकीय हालचालींमध्ये नेते व्यस्त आहेत. मात्र, राज्यातील जनतेच्या प्रश्नांकडे आणि विकासाच्या मुद्द्यांकडे दुर्लक्ष होत असल्याचा आरोप त्यांनी केला.

वसंत मोरे म्हणाले, “राजकीय ऑपरेशन्स करताना महाराष्ट्रच जणू आयसीयूमध्ये पोहोचला आहे. राज्यातील अनेक गंभीर प्रश्नांकडे सरकारचे लक्ष नाही. पुणे शहरात भाजपचे अनेक नगरसेवक असतानाही इतर पक्षांतील नगरसेवक आणि नेत्यांना आपल्या पक्षात आणण्याचे प्रयत्न सुरू आहेत. जनतेच्या समस्या सोडवण्याऐवजी विरोधी पक्ष कमकुवत करण्यावर भर दिला जात आहे.”  (Vasant More)

 

त्यांनी पुढे असा सवालही उपस्थित केला की, “सत्ताधाऱ्यांना राज्यात विरोधी पक्षच नको आहे का? लोकशाहीमध्ये सक्षम विरोधी पक्ष असणे आवश्यक आहे. पण विरोधी पक्ष संपवण्याचा प्रयत्न होत असेल, तर तो लोकशाहीसाठी धोकादायक आहे. आता राजकीय फोडाफोडी थांबवून राज्याच्या विकासाकडे लक्ष देण्याची गरज आहे.”

दरम्यान, मुलाखतीदरम्यान वसंत मोरे यांना शिंदे गटाकडून त्यांनाही ऑफर आली होती का, असा प्रश्न विचारण्यात आला. त्यावर त्यांनी स्पष्टपणे उत्तर देत सांगितले की, “हो, मला शंभर टक्के ऑफर आली होती. मात्र, ती आता नाही, काही काळापूर्वी आली होती.”  (Vasant More)

वसंत मोरे यांनी सांगितले की, पुण्यातील एका माजी नगरसेवकामार्फत त्यांच्याशी संपर्क साधण्यात आला होता. त्याच काळात ठाकरे गटाकडून त्यांची पुणे शहरप्रमुख म्हणून नियुक्ती होणार असल्याची माहिती त्यांना मिळाली होती. तत्कालीन संपर्कप्रमुख सचिन अहिर आणि खासदार संजय राऊत यांनी फोन करून दुसऱ्या दिवशी त्यांच्या नावाची घोषणा होणार असल्याचे सांगितले होते.  (Vasant More)

मात्र, त्याच रात्री शिंदे गटाकडून त्यांना पक्षात येण्याची ऑफर आली. एका माजी नगरसेवकाने त्यांना सांगितले की, उपमुख्यमंत्री एकनाथ शिंदे यांनी त्यांची आठवण काढली आहे. त्यावर वसंत मोरे यांनी विचारले की, “एवढे मोठे नेते, आमदार आणि नगरसेवक तुमच्याकडे असताना माझ्यासारख्या कार्यकर्त्याची गरज का आहे?”

त्यावर समोरून उत्तर मिळाले की, “तुमची सोशल मीडियावर चांगली पकड आहे.” मात्र, वसंत मोरे यांनी ही ऑफर नम्रपणे नाकारली. “मी आहे तिथेच समाधानी आहे,” असे त्यांनी सांगितले. तसेच महापालिका निवडणुका झाल्यानंतर आणि स्वीकृत नगरसेवकांची पदे संपल्यानंतर आता मला घेऊन काय उपयोग, असेही त्यांनी स्पष्ट केले.

वसंत मोरे यांनी पुढे सांगितले की, शिंदे गटाकडून आलेल्या या ऑफरची माहिती त्यांनी लगेच खासदार संजय राऊत यांनाही दिली होती. त्यामुळे आपण कोणतीही गोष्ट लपवली नसल्याचे त्यांनी स्पष्ट केले.

वसंत मोरे यांच्या या दाव्यामुळे राज्याच्या राजकारणात पुन्हा एकदा चर्चांना उधाण आले आहे. मात्र, त्यांच्या या विधानावर शिंदे गटाकडून अद्याप कोणतीही अधिकृत प्रतिक्रिया आलेली नाही.