बारामती : श्री सोमेश्वर सहकारी साखर कारखान्याच्या निवडणुकीत शेवटच्या क्षणी चकवा देत बंडखोरी करणारे अध्यक्ष पुरूषोत्तम जगताप हे राष्ट्रवादी कॉंग्रेस (अजित पवार) गटाच्या रडारवर आले आहेत. जगताप यांनी बंडखोरी करीत ‘लोकनेता अजितदादा पॅनल’ रिंगणात उतरविले आहे. त्यामुळे अजितदादांच्या नावावरून वाद निर्माण झाला आहे. त्यामुळे जगताप यांच्या अडचणीत वाढ झाली आहे. युवा नेते जय पवार यांनी कारवाईचा इशारा दिल्याने भाजपशी घरोबा केलेल्या जगताप यांच्या पॅनलविरोधात रान तापले आहे.

सोमेश्‍वरच्या शिवारात दिवंगत उपमुख्यमंत्री अजित पवार यांच्या नावावरून राजकीय संघर्ष उफाळून आला आहे. कारखान्याचे विद्यमान अध्यक्ष पुरुषोत्तम जगताप यांनी स्वतंत्र पॅनल उभे केले असून, पॅनलच्या प्रचारात ‘लोकनेता अजितदादा पॅनल’ या नावाचा वापर केल्याने राष्ट्रवादी काँग्रेसच्या अजित पवार गटाने आक्षेप घेतला आहे.

जगताप यांच्या पॅनलकडून उपमुख्यमंत्री सुनेत्रा पवार यांचा व्हिडिओ मॉर्फ करून प्रचारासाठी वापरल्याचा, तसेच दिवंगत अजित पवार यांच्या आवाजाचा आणि एआय तंत्रज्ञानाचा वापर करून व्हिडिओ तयार केल्याचा आरोप केला आहे. या पार्श्वभूमीवर युवा नेते जय पवार यांनी जगताप यांच्यावर कारवाईचा इशारा दिला आहे.

‘पुरुषोत्तम जगताप यांना अजितदादांचे नाव आणि छायाचित्र परवानगीशिवाय वापरू नका, असे सांगितले होते. मात्र आता सुनेत्रा पवार यांचा व्हिडिओ वापरून प्रचार केला जात आहे. त्यामुळे पक्षाच्या वतीने त्यांच्यावर कारवाई करण्यात येईल. कोणती कारवाई करायची, हे आज सायंकाळपर्यंत स्पष्ट होईल,’ असे जय पवार यांनी सांगितले. दिवंगत अजित पवार यांच्या आवाजाचा वापर करून तयार करण्यात आलेल्या व्हिडिओप्रकरणीही कारवाई केली जाणार असल्याचे जय पवार यांनी स्पष्ट केले.

जगतापविरोधात अद्याप नाराजी

सोमेश्‍वर साखर कारखान्याचे अध्यक्ष पुरूषोत्तम जगताप यांना १३ वर्षे अध्यक्षपदाची संधी दिली आहे. तरीही त्यांना पुन्हा अध्यक्षपद हवे आहे काय, असा सूर सभासदांमधून उमटत आहे. जगताप यांनी उमेदवारी अर्ज माघारी घेण्याच्या शेवटच्या क्षणापर्यंत गाफील ठेवले, अशी प्रतिक्रिया अजित पवार गटाच्या सभासदांमधून उमटली आहे. ज्यांना पद देऊन मोठे केले, त्यांनीच दगाफटका केल्याची भावना निर्माण झाली आहे.