Cylinder Blast – कोंढापुरी (ता. शिरूर) येथे २५ एप्रिल रोजी रात्रीच्या सुमारास एका घरात गॅस सिलेंडरचा भीषण स्फोट होऊन लागलेल्या आगीत संपूर्ण घर जळून खाक झाले आहे. या आगीत घरातील सर्व वस्तू जळाल्या असून लाखो रुपयांचे नुकसान झाले आहे. सुदैवाने अडसूळ कुटुंबीय वेळीच घराबाहेर पडल्याने मोठी जीवितहानी टळली आहे. मिळालेली माहिती अशी की, काशिनाथ अडसूळ यांच्या घरी हिराबाई अडसूळ स्वयंपाक करत असताना अचानक गॅस सिलेंडरचा भडका उडून स्फोट झाला.

स्फोटाचा आवाज ऐकताच माजी सरपंच स्वप्नील गायकवाड, पोलीस पाटील राजेश गायकवाड आणि ग्रामस्थांनी तातडीने धाव घेत आग आटोक्यात आणण्याचा प्रयत्न केला. मात्र, काही वेळातच दुसऱ्या सिलेंडरचाही स्फोट झाल्याने आगीने रौद्र रूप धारण केले. या आगीत घरातील कपडे, धान्य, इलेक्ट्रिक वस्तू आणि इतर सर्व साहित्य जळून कोळसा झाले.

घटनेची माहिती मिळताच रांजणगाव औद्योगिक वसाहतीतील अग्निशमन दलाच्या जवानांनी घटनास्थळी धाव घेत आगीवर नियंत्रण मिळवले. या दुर्घटनेमुळे अडसूळ कुटुंब उघड्यावर आले असून परिसरात हळहळ व्यक्त होत आहे. प्रशासकीय पातळीवर या घटनेची दखल घेण्यात आली असून, नुकसान भरपाईसाठी प्रयत्न सुरू करण्यात आले आहेत.

“कोंढापुरी येथील आगीच्या घटनेचा पंचनामा करण्यात आलेला असून, त्याबाबतचा अहवाल वरिष्ठ कार्यालयाला पाठवून सदर कुटुंबियांना मदत मिळवून देण्यात येणार आहे.”
– शारदा शिरसाठ, तलाठी