Suryakumar Yadav : इंडियन प्रीमियर लीग (IPL) २०२६ चा हंगाम मुंबई इंडियन्स (MI) संघासाठी अत्यंत निराशाजनक ठरला. हंगामातील आपल्या शेवटच्या सामन्यातही मुंबईच्या पदरी निराशाच आली, जिथे राजस्थान रॉयल्सविरुद्धच्या लढतीत त्यांना ३० धावांनी पराभव स्वीकारावा लागला.

या पराभवासोबतच मुंबई इंडियन्सचे या वर्षातील आयपीएलमधील आव्हान अधिकृतपणे संपुष्टात आले असून, संघ प्लेऑफच्या शर्यतीतून आधीच बाहेर पडला होता. या संपूर्ण हंगामात मुंबईच्या संघाला अपेक्षेप्रमाणे कामगिरी करता आली नाही आणि संपूर्ण संघच फ्लॉप ठरला.

असे असले तरी, हंगामातील या शेवटच्या सामन्यात मुंबई इंडियन्सचा स्टार फलंदाज सूर्यकुमार यादव (Suryakumar Yadav) याने मात्र आपल्या बॅटची कमाल दाखवली. संपूर्ण हंगामात धावांसाठी संघर्ष करणाऱ्या सूर्यकुमारने राजस्थान रॉयल्सविरुद्धच्या सामन्यात चमकदार फलंदाजी केली. त्याने मैदानात चौफेर फटकेबाजी करत ४२ चेंडूंमध्ये ६४ धावांची शानदार खेळी उभारली.  (Suryakumar Yadav)

या खेळीदरम्यान त्याने (Suryakumar Yadav) ३ चौकार आणि ४ उत्तुंग षटकार ठोकले. परंतु, त्याची ही एकाकी झुंज मुंबई इंडियन्सला विजय मिळवून देण्यासाठी पुरेशी ठरली नाही आणि संघाला पराभवाचा सामना करावा लागला.

या संपूर्ण हंगामात सूर्यकुमार यादव आपल्या नेहमीच्या आक्रमक आणि जुन्या फॉर्ममध्ये दिसला नाही. त्यामुळे क्रिकेट जगतात आणि सोशल मीडियावर त्याच्या फॉर्मसोबतच त्याच्या फिटनेसवरही अनेक प्रश्न उपस्थित केले जात होते. विशेषतः सूर्यकुमारच्या मनगटाला गंभीर दुखापत झाली असल्याच्या जोरदार चर्चा रंगल्या होत्या.

अनेक तज्ज्ञ आणि चाहत्यांकडून त्याच्या मनगटाच्या दुखापतीमुळेच त्याचा फॉर्म घसरल्याचा दावा केला जात होता. आता या सर्व चर्चांवर आणि अफवांवर स्वतः सूर्यकुमार यादवने मौन सोडले असून टीकाकारांना सडेतोड उत्तर दिले आहे.

सामन्यानंतर ब्रॉडकास्टर्सशी बोलताना सूर्यकुमार यादवने (Suryakumar Yadav) आपल्या दुखापतीच्या अफवांचा चांगलाच समाचार घेतला. तो म्हणाला, “माझ्या मनगटाच्या दुखापतीबद्दल जे लोक उलटसुलट बोलत आहेत, ते एकतर स्वतःला खूप मोठे फिजिओ समजत असावेत किंवा मग त्यांना क्रिकेटची अजिबात समज नसावी. जर खरोखरच माझ्या मनगटाला गंभीर दुखापत झाली असती, तर मी माझा ट्रेडमार्क फ्लिक शॉट्स कधीच खेळू शकलो नसतो.”

सूर्यकुमारने पुढे स्पष्ट केले की, त्याचे बहुतांश फटके हे मनगटाच्या हालचाली आणि ‘हँड-आय कोऑर्डिनेशन’ (हात आणि डोळ्यांचा ताळमेळ) यावरच पूर्णपणे अवलंबून असतात. त्यामुळे मनगट दुखावले असताना असे शॉट्स खेळणे अशक्य आहे.

अशा फालतू अफवांवर आपण अजिबात लक्ष देत नसल्याचे स्पष्ट केले. तसेच क्रिकेटमध्ये चढ-उतार येत असतात आणि काही गोष्टी खेळाडूच्या नियंत्रणात नसतात. जे आपल्या हातात नाही, त्यावर विचार करण्यापेक्षा आपल्या खेळावर लक्ष केंद्रित करणे योग्य असल्याचे सांगत त्याने या वादावर पडदा टाकला आहे.