Duleep Trophy Final : चेन्नईतील एमए चिदंबरम स्टेडियमवर दुलीप ट्रॉफी स्पर्धेच्या (Duleep Trophy Final) अंतिम सामन्यात ईस्ट झोन आणि साऊथ झोन यांच्यात जेतेपदासाठी चुरस सुरू आहे. नाणेफेक जिंकून प्रथम फलंदाजी करणाऱ्या ईस्ट झोनने फलंदाजांच्या उत्कृष्ट कामगिरीच्या जोरावर पहिल्या डावात ७०८ धावांचा प्रचंड डोंगर उभारला.

अभिमन्यू ईश्वरनच्या ७२ आणि वैभव सूर्यवंशीच्या ४४ धावांनंतर कर्णधार इशान किशनच्या बॅटने मैदानात धावांचे वादळ उठवले. इशानने ३३४ चेंडूंचा सामना करताना ३० चौकार आणि ७ उत्तुंग षटकारांसह २७० धावांची धडाकेबाज खेळी केली.

या महाकाय धावसंख्येचा पाठलाग करताना साऊथ झोनची (Duleep Trophy Final) सुरुवात अडखळती झाली. सलामीवीर रिकी भुई केवळ एका धावेवर बाद झाला. त्यानंतर नारायण जगदीशन (३२ धावा) आणि देवदत्त पडिक्कल (अर्धशतक) यांनी ६० धावांची भागीदारी करून डाव सावरण्याचा प्रयत्न केला, परंतु नियमित अंतराने विकेट्स पडल्यामुळे २५० धावांपर्यंत साऊथ झोनचे ५ फलंदाज तंबूत परतले. ईस्ट झोनकडे अजूनही साडेचारशेहून अधिक धावांची भक्कम आघाडी असून त्यांनी सामन्यावर पूर्ण नियंत्रण मिळवले आहे.

सामना ड्रॉ झाल्यास ट्रॉफी कोणाकडे जाणार, याबाबत बीसीसीआयचे नियम स्पष्ट आहेत. देशांतर्गत क्रिकेटच्या पाच दिवसीय अंतिम सामन्यात थेट निकाल न लागल्यास पहिल्या डावातील आघाडीचा नियम लागू होतो.

म्हणजेच पाचव्या दिवसाअखेर सामना (Duleep Trophy Final) अनिर्णित राहिला, तरी पहिल्या डावात निर्णायक आघाडी घेणारा संघच जेतेपदाचा मानकरी ठरतो. सद्यस्थिती पाहता ईस्ट झोनने सामन्यावर मजबूत पकड घेतली असून हा सामना ड्रॉ झाला तरी नियमांनुसार चषक उंचावण्यासाठी त्यांचाच दावा सर्वात प्रबळ मानला जात आहे.