Pakistan News : पाकिस्तानच्या खैबर पख्तूनख्वा प्रांतातील डेरा इस्माईल खान शहरात रस्त्यालगत असलेल्या पोलिस चौकीजवळ भीषण स्फोट झाला. या घटनेत ११ जणांचा मृत्यू झाला असून ३० हून अधिक जण जखमी झाले आहेत. तहरीक-ए-तालिबान पाकिस्तानने (टीटीपी) या हल्ल्याची जबाबदारी स्वीकारल्याचे वृत्त आहे.

मिळालेल्या माहितीनुसार, हा आत्मघाती हल्ला होता. स्फोटकांनी भरलेले वाहन पोलिसांच्या चौकीवर आदळवण्यात आले. त्यानंतर झालेल्या मोठ्या स्फोटात अनेक जण जखमी झाले. जखमींना उपचारासाठी जवळच्या रुग्णालयात दाखल करण्यात आले आहे.

डेरा इस्माईल खानसह पाकिस्तानच्या उत्तर-पश्चिम भागात टीटीपीकडून यापूर्वीही हल्ले करण्यात आले आहेत. पाकिस्तानकडून टीटीपीचे सदस्य अफगाणिस्तानात आश्रय घेत असल्याचा आरोप केला जातो. मात्र, अफगाणिस्तानातील तालिबानने टीटीपीशी संबंध असल्याचे नाकारले आहे.

टीटीपी आणि अफगाणिस्तानातील तालिबान हे दोन वेगवेगळे संघटन आहेत. टीटीपी पाकिस्तान सरकारच्या धोरणांना विरोध करत असून पाकिस्तानमध्ये इस्लामिक कायद्याची अंमलबजावणी व्हावी, अशी त्यांची भूमिका आहे. या विचारसरणीतून टीटीपीकडून पाकिस्तानविरोधात सातत्याने हल्ले केले जात असल्याचे सांगितले जाते.