Food inflation : सर्वसामान्यांच्या रोजच्या जेवणाचा खर्च वाढत असून कांदा, आले, खाद्यतेल, दूध-पनीर आणि चिकनच्या किमतींवर महागाईचा दबाव वाढला आहे. ब्लूमबर्गच्या अहवालानुसार, ऑगस्टमध्ये कांद्याचे दर वर्षभराच्या तुलनेत सुमारे ५० टक्क्यांनी, तर आल्याचे दर ७० टक्क्यांहून अधिक वाढले आहेत.

ग्रामीण भागातील काही कुटुंबांच्या मासिक खर्चापैकी जवळपास निम्मा खर्च अन्नावर होतो. शहरांमध्ये हे प्रमाण सुमारे ४० टक्के आहे. त्यामुळे खाद्यपदार्थ महागल्यास इतर खर्चांना कात्री लावावी लागू शकते.  (Food inflation)

कमी पावसाचा फटका –  (Food inflation )

मान्सूनचा पाऊस जूनपासून आतापर्यंत सामान्यपेक्षा सुमारे १५ टक्के कमी राहिला आहे. याचा परिणाम धान, मका, सोयाबीन आणि ऊस उत्पादनावर होण्याची शक्यता आहे. धान आणि मक्याची पेरणीही मागील वर्षाच्या तुलनेत ३ टक्क्यांहून अधिक कमी आहे.

पेट्रोलमध्ये २० टक्के इथेनॉल मिश्रणाचे उद्दिष्ट गाठण्यासाठी मका आणि तांदळाची मागणी वाढत आहे. त्यामुळे अन्न आणि पशुखाद्यासाठी उपलब्ध धान्यावर दबाव येऊ शकतो.

चिकन, दूधही महागण्याची शक्यता – (Food inflation)

 

पशुखाद्यात वापरल्या जाणाऱ्या धान्याच्या किमती वाढल्याने चिकनचे दरही वाढू शकतात. एका विक्रेत्याने सांगितले की, चिकनचा दर २४० रुपयांवरून २६० रुपये किलो केला असून पुढे ३०० रुपयांपर्यंत वाढण्याची शक्यता व्यक्त केली आहे.

दरम्यान, दूध, पनीर आणि स्वयंपाकाच्या इंधनाचा खर्चही वाढला आहे. सणासुदीच्या काळात मागणी वाढल्याने महागाईचा दबाव आणखी वाढण्याची शक्यता आहे. खाद्यपदार्थांच्या किमती वाढल्यास एकूण किरकोळ महागाईवरही परिणाम होऊ शकतो. त्यामुळे आगामी काळात पाऊस, पीक उत्पादन आणि अन्नधान्याच्या किमतींवर सर्वांचे लक्ष राहणार आहे.