प्रभात वृत्तसेवा पुसेगाव – महाराष्ट्र आणि इतर राज्यांमधील लाखो भाविकांचे श्रद्धास्थान असलेल्या पुसेगाव, ता. खटाव येथील प. पू. श्री सेवागिरी महाराजांच्या 78 व्या पुण्यस्मरणानिमित्त उद्या, दि. 18 रोजी रथसोहळा होत आहे. महाराष्ट्राच्या मंत्रिमंडळातील मान्यवरांच्या प्रमुख उपस्थितीत सकाळी 9.30 वाजता रथपूजन होणार असल्याचे मठाधिपती सुंदरगिरी महाराज व देवस्थान ट्रस्टचे चेअरमन संतोष वाघ यांनी सांगितले. सेवागिरी महाराजांच्या वार्षिक यात्रेसाठी देवस्थान ट्रस्टच्यावतीने सर्व तयारी पूर्ण झाल्याचे माजी चेअरमन डॉ. सुरेश जाधव, रणधीर जाधव, संतोष जाधव, विश्वस्त सचिन देशमुख आणि गौरव जाधव यांनी सांगितले. मुख्यमंत्री देवेंद्र फडणवीस, उपमुख्यमंत्री अजित पवार आणि एकनाथ शिंदे, सार्वजनिक बांधकाम मंत्री शिवेद्रसिंहराजे भोसले, ग्रामविकास मंत्री जयकुमार गोरे, पालकमंत्री शंभूराज देसाई, मदत व पुनर्वसन मंत्री मकरंद पाटील, खासदार उदयनराजे भोसले, खासदार नितीन पाटील, कृष्णा खोरे विकास महामंडळाचे अध्यक्ष आमदार महेश शिंदे, आमदार शशिकांत शिंदे, आमदार मनोज घोरपडे, आमदार डॉ. अतुल भोसले, आमदार सचिन पाटील, जिल्हाधिकारी संतोष पाटील, पोलीस अधीक्षक तुषार दोशी, मठाधिपती सुंदरगिरी महाराज, ट्रस्टचे चेअरमन संतोष वाघ, विश्वस्त डॉ. सुरेश जाधव, रणधीर जाधव, संतोष जाधव, सचिन देशमुख, गौरव जाधव माजी चेअरमन, माजी विश्वस्त, ग्रामस्थ व भाविकांच्या उपस्थितीत रथपूजन करण्यात येणार आहे. रथपूजनानंतर प. पू. श्री सेवागिरी महाराजांची प्रतिमा व पादुका ठेवलेला, फुलांनी सजवलेला आणि नोटांच्या माळांनी झाकोळलेला रथ पुसेगावातून प्रदक्षिणेसाठी निघणार आहे. या मिरवणुकीत झांज, बँजो आणि बँडपथके सहभागी होणार आहेत. ट्रस्टच्यावतीने भाविकांना बुंदीचा प्रसाद मोफत देण्यात येणार आहे. श्री सेवागिरी मंदिर व परिसरात आकर्षक विद्युत रोषणाई व रंगरंगोटी करण्यात आली आहे. रथोत्सवासाठी सातारा, कोरेगाव, वडूज, दहिवडी, फलटण येथून 250 जादा एसटी बसगाड्या सोडण्यात येणार आहेत. पुसेगाव परिसरातील गावोगावी गाड्यांची सोय करण्यात आली आहे. पुसेगावच्या चारही दिशंना एसटी महामंडळाने पिकअप शेड उभारली आहेत. यात्रेसाठी प्राथमिक आरोग्य केंद्राने विविध उपाययोजनांची जय्यत तयारी केली आहे. यात्रा काळात अप्पर जिल्हा पोलीस अधीक्षक व कोरेगावचे पोलीस उपअधीक्षक यांच्या मार्गदर्शनाखाली पुसेगाव पोलीस ठाण्याचे सपोनि संदीप पोमण व पोलीस यंत्रणा बंदोबस्तासाठी सज्ज आहे. भाविक व ग्रामस्थांसाठी ग्रामपंचायतीच्यावतीने सर्व सोयीसुविधा पुरवण्यात आल्याचे प्रभारी सरपंच विशाल जाधव आणि ग्रामपंचायत अधिकारी अर्जुन नागरगोजे यांनी सांगितले.
