Satara ZP Election – भुईंज गणाचा सर्वांगीण विकास हे ध्येय उराशी बाळगून आपले आराध्य दैवत श्री. महालक्ष्मीचे आशीर्वाद घेऊन आजपासून प्रचारास सुरुवात करत आहे. त्यामुळे तुमच्या सर्वांचे आशीर्वाद माझ्या पाठीशी सदैव राहूद्यात आपला विजय निश्चित आहे, असा विश्वास भुईंज गणातील भाजपच्या अधिकृत उमेदवार डॉ. सुरभी भोसले यांनी केले.भुईंज येथील श्री. महालक्ष्मी मंदिरात प्रचार शुभारंभ कार्यक्रमात त्या बोलत होत्या. यावेळी डॉ. सुरभी भोसले यांनी श्री महालक्ष्मी देवीचे दर्शन घेत विजयासाठी आशीर्वाद मागितले. यावेळी माजी आमदार मदनदादा भोसले, भुईंज जिल्हा परिषद गटाचे उमेदवार दिलीप बाबर, भैय्यासाहेब जाधवराव, अर्जुन भोसले, विजय ढेकाणे, विजय वेळे, रवींद्र भोसले, रमेश चिकणे, मोहन भोसले यांची प्रमुख उपस्थिती होती.सुरभीताई भोसले म्हणाल्या, राज्य शासन व केंद्र शासनाच्या माध्यमातून परिसरातील विकासासाठी भरघोस निधी उपलब्ध करून दिला आहे. यापुढे सुद्धा शेती, पाणी, शैक्षणिक, कचरा संकलन केंद्र, इत्यादी प्रश्न मार्गी लावून गणाचा सर्वांगीण विकास करणार आहे. कोणत्याही परिस्थितीत सर्वसामान्य नागरिकांसाठी झटत राहणार आहे गणाचा सर्वांगीण विकास, पारदर्शक कारभार आणि सामान्य माणसाला न्याय देणे हेच माझे प्रमुख ध्येय आहे.केंद्र व राज्य सरकारच्या विविध विकास योजनांचा उल्लेख करत या योजनांचा लाभ तळागाळातील जनतेपर्यंत पोहोचवण्यासाठी मी कटिबद्ध असल्याचे त्यांनी सांगितले. मदनदादा भोसले आगामी निवडणुकीत विजयासाठी त्यांनी नागरिकांकडे आशीर्वाद मागितले. नागरिकांनीही त्यांना उत्स्फूर्त प्रतिसाद देत जोरदार पाठिंबा दर्शवला.भैय्यासाहेब जाधव यांनी भाजपच्या डॉ. सुरभी भोसले, दिलीप बाबर, वनिता शिंदे यांना प्रचंड मतांनी विजयी करा, असे आवाहन केले. यावेळी माजी आमदार मदनदादा भोसले यांनी मार्गदर्शन केले. यावेळी ज्येष्ठ नागरिक, युवा वर्ग व महिलांचा सहभाग दिसून आला. मदनदादा भोसले यांची मिश्किल टिप्पणी सर्वत्र हशा – कार्यक्रमाप्रसंगी भुईंज जिल्हा परिषद गटाचे उमेदवार दिलीप बाबर यांनी मदनदादा भोसले यांनी माझ्यावर दाखवलेल्या विश्वासास मी पात्र राहीन. त्यांना सोडून मी कुठेही जाणार नाही. एकनिष्ठ राहिन, असे बोलताच मदनदादा भोसले यांनी मिश्किल टिप्पणी केली. त्यावर सर्वत्र एकच हशा पिकला व संपूर्ण वातावरण आनंदाने ढवळून निघाले.
