प्रभात वृत्तसेवा भुईंज – मर्ढे ता. सातारा येथील थोर कवी बा. सी. मर्ढेकर स्मारकास पुणे विभागीय आयुक्त चंद्रकांत कुलकुंडवार यांनी नुकतीच भेट दिली. या भेटीदरम्यान ग्रामस्थांनी, स्मारकाचे काम पूर्ण होऊनही आजपर्यंत उद्घाटन झाले नसल्याबाबत नाराजी व्यक्त केली. तसेच हे स्मारक तात्काळ ग्रामस्थांच्या ताब्यात देण्याची ठाम मागणी केली. ग्रामस्थांची भावना लक्षात घेत आयुक्त पुलकुंडवार यांनी तत्काळ दखल घेत स्मारकासंदर्भातील सर्व प्रक्रिया पूर्ण करून या आठवड्यातच स्मारक ग्रामस्थांच्या स्वाधीन करण्याचे आदेश जिल्हाधिकारी संतोष पाटील यांना दिले.यामुळे उपस्थित ग्रामस्थांमध्ये आनंदाचे वातावरण निर्माण झाले. यावेळी जिल्हाधिकारी संतोष पाटील, जिल्हा परिषदेच्या मुख्य कार्यकारी अधिकारी याशनी नागराजन, प्रांत अधिकारी आशिष बारकुल, तहसीलदार समीर यादव यांच्यासह ग्रामपंचायतीच्या सरपंच सविता शिंगटे, उपसरपंच विक्रम शिंगटे, मानसिंगराव शिंगटे, उमेश मर्ढेकर, सुधाकर शिंगटे तसेच महिला व ग्रामस्थ उपस्थित होते.यावेळी आयुक्तांनी बा.सी. मर्ढेकर स्मारकाची भव्य इमारत तसेच कवी मर्ढेकर यांचे वास्तव्य असलेल्या घराची पाहणी केली. स्मारकातील कविता व साहित्य पाहून ते भारावून गेले. अभ्यासक्रमात समाविष्ट असलेल्या बा.सी. मर्ढेकर यांच्या कविता प्रत्यक्ष पाहून त्यांनी विशेष समाधान व्यक्त केले. ही भेट आणि दिलेले आदेश म्हणजे मराठी साहित्यप्रेमींसाठी आणि मर्ढे गावासाठी ऐतिहासिक क्षण असून, लवकरच स्मारक सर्वसामान्य रसिकांसाठी खुले होणार असल्याने ग्रामस्थांमध्ये उत्साहाचे वातावरण आहे.
