प्रभात वृत्तसेवा सातारा – देशाचे नेते आणि राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांचा ८६ वा वाढदिवस पक्षाच्या पाटण तालुक्याच्यावतीने शुक्रवारी (दि. १२) पाटण येथे आयोजित करण्यात आला आहे, अशी माहिती तालुकाध्यक्ष राजाभाऊ काळे, कार्याध्यक्ष ॲड. राजन भिसे यांनी दिली. यावेळी पक्षाचा मेळावा घेण्यात येणार आहे. शरद पवार यांच्या वाढदिवसानिमित्त पाटण तालुका राष्ट्रवादी कॉंग्रेसच्यावतीने रुग्णालयातील रुग्णांना फळेवाटप करण्यात येणार आहे. केक कापून वाढदिवस साजरा केला जाणार आहे. कार्यक्रमास पक्षाचे प्रदेश सरचिटणीस नरेश देसाई उपस्थित राहणार आहेत. आगामी जिल्हा परिषद व पंचायत समिती निवडणुकीच्या पार्श्वभूमीवर बैठक घेऊन उमेदवारीबाबत चर्चा करण्यात येणार आहे. तालुक्यातील पक्षाच्या आजी माजी पदाधिकाऱ्यांनी तसेच शरद पवार याना मानणाऱ्या पदाधिकारी व कार्यकर्त्यांनी पाटणमधील झेंडा चौकातील प्राथमिक शिक्षक बँकेच्या सभागृहात सकाळी ११ वाजता उपस्थित राहवे, असे आवाहन राजाभाऊ काळे यांनी केले आहे.
