प्रभात वृत्तसेवा सातारा – नगराध्यक्ष अमोल मोहिते यांच्या नावाचे गॅझेट प्रसिद्ध होऊन तब्बल तेरा दिवस उलटले. अजूनही सातारा पालिकेच्या पहिल्या सर्वसाधारण सभेची सर्व नूतन नगरसेवकांना प्रतीक्षा आहे. त्यातच मुख्याधिकारी विनोद जळक हे दीर्घ मुदतीच्या रजेवर गेल्याने कार्यभार नगर प्रशासन अधिकारी अभिजीत बापट यांच्याकडेच देण्यात आल्याची चर्चा आहे.सातारा पालिकेचे प्रशासकीय बजेट तसेच उपनगराध्यक्ष व स्वीकृत नगरसेवकांच्या निवडी या अत्यंत महत्त्वाच्या असून त्या दृष्टीने सातारा पालिकेची पहिली सर्वसाधारण सभा तातडीने होणे गरजेचे आहे. सर्वसाधारण सभा बोलवण्याचा तांत्रिक अधिकार नगराध्यक्ष यांचा असून सर्वसाधारण सभेचे ते पिठासन अधिकारी असतात. सातारा नगरपालिका यंत्रणा तसेच स्वतः नगराध्यक्ष अमोल मोहिते साताऱ्यात भरलेल्या 99 व्या अखिल भारतीय मराठी साहित्य संमेलनामध्ये पूर्णतः सक्रिय होते. सोमवारी या संमेलनाचे सूप वाजले. कार्यालयीन अधीक्षक यांच्याकडून सर्वसाधारण सभेचा अजेंडा तयार होऊन नगराध्यक्षांच्या टेबलावर पोहोचला आहे. आता नगराध्यक्षांनी चार सर्वसाधारण सभा बोलवण्याची प्रतीक्षा बाकी आहे. नियमाप्रमाणे ज्यावेळी गॅझेट प्रसिद्ध होते त्यानंतर तीन आठवड्याच्या आत पहिली सर्वसाधारण सभा बोलवली जाणे अपेक्षित असते. तसेच या सभेला सात दिवसाची नोटीस द्यावी लागते. 23 डिसेंबर 2025 रोजी नगराध्यक्ष अमोल मोहिते आणि सर्व नगरसेवकांच्या नावाचे गॅझेट प्रसिद्ध झाले .दि. 17 जानेवारी पर्यंत सर्वसाधारण सभा होणे अपेक्षित आहे. मात्र, तत्पूर्वी सर्वसाधारण सभेचा अजेंडा निघाल्याच्या दिवसापासून बरोबर सात दिवसाचा कालावधी बाकी ठेवून सभा बोलवावी लागते. त्यामुळे तांत्रिक क्लिष्टते पासून वाचायचे असेल तर नगराध्यक्षांना ही सभा लवकरच लवकर बोलवण्याची गरज निर्माण झाली आहे. तसेच सातारा नगरपालिकेचे प्रशासकीय बजेट याशिवाय विविध विषय समित्यांचे सभापती हे नंतरच्या दुसऱ्या विशेष सभेला निवडायचे आहेत. त्यामुळे राहिलेल्या तांत्रिक प्रक्रिया या तत्काळ उरकून प्रत्यक्ष कामकाजाला सुरुवात व्हावी अशी अपेक्षा आहे. अभिजीत बापट यांच्याकडे सूत्रे सातारा पालिकेचे मुख्याधिकारी विनोद जळक हे पंधरा दिवसाच्या रजेवर गेल्याची माहिती सातारा नगरपालिकेतील प्राप्त झाली आहे. त्यामुळे सातारा पालिकेचा तात्पुरता कार्यभार नगर प्रशासनाधिकारी अभिजीत बापट यांच्याकडे देण्यात आल्याचे सूत्रांची माहिती आहे.त्यांच्याकडेही दै. प्रभातने या संदर्भात पाठपुरावा केला असता त्यांनी प्रश्न समजावून घेतला मात्र त्याचे उत्तर काही दिले नाही. जळक यांच्या रजेचे निमित्त एक कौटुंबिक स्वरूपाचे असल्याची खात्रीशीर माहिती आहे. निवडणूक झाल्यानंतर ते पुन्हा रजेवर गेल्याने उलट सुलट चर्चांना सुरुवात झाली होती. उपनगराध्यक्षपदासाठी कोणाची वर्णी गॅजेट प्रसिध्दीला तेरा दिवस उलटून गेल्यानंतरही अद्याप सर्वसाधारण सभा बोलवण्यात न आल्याने नगरसेवकांची अस्वस्थता वाढली आहे. तसेच खासदार उदयनराजे गटाचा उपनगराध्यक्ष निवडला जाणार आहे. त्यामुळे सातारा विकास आघाडीच्या बैठकीकडे राजकीय वर्तुळाचे लक्ष लागून राहिले आहे. उपनगराध्यक्ष पदासाठी कोणाची वर्णी लागणार ?त्यासाठी सर्वसाधारण सभेची तारीख निश्चित होऊन तसा कार्यक्रम जाहीर होणे गरजेचे आहे.
