प्रभात वृत्तसेवा म्हसवड – म्हसवड नगरपरिषदेत मुख्याधिकारी डॉ. सचिन माने व नगराध्यक्षा पुजा विरकर यांच्या प्रमुख उपस्थितीत उपनगराध्यक्ष पदासाठी भाजपच्या श्रीदेवी निशांत पिसे यांची सर्वानुमते निवड करण्यात आली.नगरपालिकेत ग्रामविकास मंत्री जयकुमार गोरे यांची एकहाती सत्ता असून ना. गोरे यांनी विरोधकांना 21/0 अशी धुळ चारत पालिका ताब्यात घेतली आहे. पालिकेच्या नगराध्यक्षपदी पुजा सचिन विरकर यांची वर्णी मंत्री गोरे यांनी लावत म्हसवडकरांना निवडणुकीपुर्वी दिलेला शब्द खरा करुन दाखवला.उपनगराध्यक्ष पदाची निवड होणार असल्याने शहरात यावरुन अनेक चर्चा सुरु होत्या. मात्र अंतिम निर्णय मंत्री गोरे हेच घेणार असल्याने ते कोणाचे नाव घेणार, याबाबत उत्सुकता होती, तर पालिकेच्या नगराध्यक्षपदी एक महिला असल्याने उपनगराध्यक्ष पदासाठी एखादा पुरुष निवडला जाईल, अशी चर्चा सुरु असताना मंत्री गोरे यांनी या पदासाठी शहरातील एका सर्वसामान्य कुटुंबातील श्रीदेवी निशांत पिसे या महिलेची निवड केली. मंत्री गोरे यांच्या या निर्णयाचे पालिका सदस्यांसह, प्रशासनातून व म्हसवडकरांमधून स्वागत करण्यात आले.ना. जयकुमार गोरे हे दूरदृष्टीचे नेते असल्यानेच त्यांनी सामान्य कुटुंबातील महिलेला या पदासाठी संधी दिली असल्याने सामान्य नागरीकांतून आनंद व्यक्त केला जात आहे.
