प्रभात वृत्तसेवा रहिमतपूर – रहिमतपूर नगरपालिकेच्या उपनगराध्यक्षपदी राष्ट्रवादीचे केतन माने यांची बिनविरोध निवड करण्यात आली आहे. तसेच स्वीकृत नगरसेवक पदासाठी भाजपकडून किरण भोसले व राष्ट्रवादी करून सुनील माने यांची निवड करण्यात आली आहे. उपनगराध्यक्ष पदासाठी केतन माने यांचा एकमेव अर्ज दाखल झाला होता. निर्धारित वेळेपर्यंत कोणाचाही अर्ज दाखल न झाल्याने मुख्याधिकारी सतिश चव्हाण यांनी केतन माने यांची बिनविरोध निवड जाहीर केली. रहिमतपूर नगरपालिकेच्या नगराध्यक्ष पदावर भाजपच्या वैशाली निलेश माने यांची निवड झाली आहे. या निवडणुकीत नगराध्यक्षपदाबरोबरच नऊ नगरसेवक भाजपचे निवडून आले आहेत. रहिमतपूर पालिकेसाठी राष्ट्रवादी काँग्रेस अजितदादा गट व शिवसेना शिंदे गटाने एकत्रित निवडणूक लढवलेली होती. यात आघाडीचे अकरा नगरसेवक निवडून आले होते. यामध्ये दोन नगरसेवक शिवसेना शिंदे गटाचे आहेत. नगराध्यक्षपद भाजपच्या ताब्यात गेल्यानंतर उपनगराध्यक्ष पद राष्ट्रवादी काँग्रेस-शिवसेना युतीकडेच राहील अशी शक्यता होती. परंतु भाजपच्या वतीने उपनगराध्यक्षपदही भाजपला मिळावे यासाठी अंतर्गत हालचाल सुरू होती. परंतु नगरसेवकांची गोळाबेरीज न झाल्यामुळे भाजपने उपनगराध्यक्ष पदाच्या शर्यतीत उमेदवार उतरविला नाही. शिवसेना उबाठा गटातून भाजपमध्ये प्रवेश केलेल्या किरण भोसले यांना स्वीकृत नगरसेवक पदाची लॉटरी लागली आहे. निवडणूक निर्णायक टप्प्यावर असतानाच किरण माने यांनी भाजपमध्ये प्रवेश केला होता. किरण भोसले यांची निर्णायक मते भाजपच्या विजयाला कारणीभूत ठरली असून याचा फायदा भाजपच्या नगराध्यक्ष तसेच प्रभागातील उमेदवारासाठी झाला आहे. याची पोचपावती किरण भोसले यांना मिळाली असून त्यांना स्वीकृत नगरसेवक पदाची लॉटरी लागली आहे.राष्ट्रवादी काँग्रेसचे नेते सुनील माने यांनी नगरपालिकेत अनेक वर्ष प्रतिनिधित्व केले आहे. यावर्षी प्रथमच सुनील माने यांना सत्ता गमवावी लागली असली तरी स्वीकृत च्या माध्यमातून सुनील माने परत एकदा नगरपालिकेत दिसणार आहेत.
