प्रभात वृत्तसेवा ZP Election 2026 – हेळवाक जिल्हा परिषद गटातील राजकीय वातावरण तापले असून भाजपमध्ये अंतर्गत नाराजी उफाळून येत असल्याचे स्पष्ट चित्र समोर आले आहे. भाजपकडून उमेदवारी नाकारण्यात आल्याने नाराज झालेले डोंगरी विभागाचे युवा नेते राजेश शिंदे यांनी उघडपणे बंडखोरीचा पवित्रा घेत शिवसेना उमेदवार अशोक पाटील यांना जाहीर पाठिंबा दिला आहे. या घडामोडीमुळे भाजपमध्ये उभी फूट पडल्याची जोरदार चर्चा सुरू झाली आहे. राजेश शिंदे हे भाजपकडून हेळवाक जिल्हा परिषदेसाठी इच्छुक उमेदवार होते. पक्षासाठी अनेक वर्षे निष्ठेने काम करूनही उमेदवारी डावलण्यात आल्याने ते प्रचंड नाराज झाले होते. अखेर त्यांनी आपल्या समर्थकांसह बैठक घेत भाजप नेतृत्वाच्या निर्णयाविरोधात उघड भूमिका घेतली आणि शिवसेनेच्या उमेदवाराला पाठिंबा देण्याचा निर्णय जाहीर केला. राजेश शिंदे म्हणाले, “मी राजकारणात पदासाठी नाही तर जनतेसाठी आलो आहे. माझ्या कामाची दखल घेतली नाही, हे दुःख आहे. पण विकासासाठी योग्य उमेदवाराला साथ देणे हे माझे कर्तव्य आहे. म्हणूनच मी अशोक पाटील यांच्या पाठीशी ठामपणे उभा आहे.” त्यांच्या या भूमिकेमुळे भाजपच्या स्थानिक कार्यकर्त्यांमध्ये संभ्रम निर्माण झाला असून अनेकांनी नाराजी व्यक्त केल्याची चर्चा आहे. शिंदे यांच्यासोबत त्यांच्या समर्थकांनीही शिवसेनेला जाहीर पाठिंबा दिल्याने भाजपसाठी ही मोठी धोक्याची घंटा मानली जात आहे.शिवसेना उमेदवार अशोक पाटील यांनी या पाठिंब्याचे स्वागत करत म्हटले की, “ही लढाई व्यक्तीची नसून विकासाची आहे. अन्यायाविरोधात उभे राहणारे सर्वजण आमच्यासोबत येत आहेत. जनतेचा विश्वास हाच आमचा खरा विजय आहे.” राजेश शिंदेंच्या या बंडखोर भूमिकेमुळे हेळवाक जिल्हा परिषद गटातील राजकीय समीकरणे पूर्णतः बदलली असून भाजपची पकड सैल होत असल्याचे स्पष्ट संकेत मिळत आहेत. येत्या काही दिवसांत आणखी नेत्यांची भूमिका स्पष्ट होणार असून निवडणूक अधिक चुरशीची होणार हे निश्चित आहे.
