Goa Club Fire : गोव्यातील भीषण अग्नितांडवानंतर देशाबाहेर पलायन करणारे नाइटक्लबचे मालक लुथरा बंधूंना थायलंडमध्ये ताब्यात घेण्यात आले. त्यांना आता भारतात आणण्याच्या प्रक्रियेला गती देण्यात आली आहे. गोव्यातील नाइटक्लबमध्ये ६ डिसेंबरची मध्यरात्र उलटल्यानंतर भीषण आग लागली. त्यामध्ये २५ जण मृत्युमुखी पडले. दुर्घटनेनंतर नाइटक्लबचे मालक गौरव आणि सौरभ लुथरा हे बंधू देशाबाहेर पसार झाल्याचे समोर आले. ते थायलंडमध्ये असल्याची माहिती मिळाली. त्यानंतर गोवा पोलिसांच्या विनंतीवरून सीबीआयच्या माध्यमातून इंटरपोलने ब्लू कॉर्नर नोटीस जारी केली. आता थायलंड पोलिसांनी लुथ्रा बंधूंना ताब्यात घेतले आहे. त्यामुळे त्यांच्या प्रत्यार्पणासाठीच्या हालचाली भारतीय यंत्रणांनी सुरू केल्या आहेत. अटक टाळण्यासाठी त्यांनी देशाबाहेर पलायन केले. मात्र, ते भारतीय यंत्रणांच्या हाती येण्याचा मार्ग मोकळा झाला आहे. सीबीआय आणि पोलीस शक्य तितक्या लवकर लुथरा बंधूंना भारतात आणतील, अशी माहिती गोव्याचे मुख्यमंत्री प्रमोद सावंत यांनी दिली. नाइटक्लबच्या मालकीत भागीदारी असणाऱ्या अजय गुप्ता याला याआधीच दिल्लीत अटक करण्यात आली. त्याला गुरूवारी गोव्यातील न्यायालयात हजर करण्यात आले. न्यायालयाने त्याला ७ दिवसांची पोलीस कोठडी सुनावली.
