Municipal Corporation Election: लातूर महानगरपालिका निवडणुकीच्या रणधुमाळीत मतदानाचा निकाल लागण्यापूर्वीच राज्याचे उपमुख्यमंत्री एकनाथ शिंदे यांनी मोठी राजकीय खेळी खेळली आहे. लातूरमधील राजकीय समीकरणे वेगाने बदलत असून तब्बल १७ अपक्ष उमेदवारांनी मुख्यमंत्री एकनाथ शिंदे यांच्या नेतृत्वाखालील शिवसेनेत जाहीर प्रवेश केला आहे. या सर्व उमेदवारांनी शिवसेनेला आपला पाठिंबा जाहीर केल्यामुळे निवडणुकीच्या रिंगणात शिंदेंच्या शिवसेनेची ताकद मोठ्या प्रमाणावर वाढली असून, अनेक प्रभागांमध्ये अधिकृत उमेदवारांचा मार्ग सुकर झाल्याची चर्चा आता राजकीय वर्तुळात रंगू लागली आहे. लातूर महानगरपालिकेत यावेळी महायुतीमधील घटक पक्ष असलेल्या शिवसेना आणि भाजपमध्ये मैत्रीपूर्ण लढत पाहायला मिळत आहे. भाजपने सर्व ७० जागांवर आपले उमेदवार उभे केले असताना, शिवसेनेने ११ जागांवर आपले अधिकृत उमेदवार मैदानात उतरवले आहेत. अशा स्थितीत १७ अपक्ष उमेदवारांनी भगवा हाती घेतल्याने शिवसेनेला मोठा बुस्ट मिळाला आहे. या पक्षप्रवेशावेळी मुख्यमंत्री शिंदे यांनी सर्व नवीन सहकाऱ्यांचे पक्षात स्वागत करून त्यांना भावी वाटचालीसाठी शुभेच्छा दिल्या. विशेष म्हणजे, या प्रवेशकर्त्यांमध्ये केवळ अपक्षच नव्हे तर भाजपमधील काही बंडखोर आणि राष्ट्रवादी काँग्रेस (शरदचंद्र पवार गट) वाहतूक सेनेचे उपाध्यक्ष उत्तमराव लोंढे यांच्यासह इतर प्रमुख पदाधिकाऱ्यांचाही समावेश आहे. पक्षात प्रवेश करणाऱ्यांमध्ये श्रीकांत रांजणकर, मनोज जोशी, निलेश मांदळे, अर्चना कांबळे, अजय गजाकोष, प्रशांत बिरादार, शोभा सोनकांबळे, प्रशांत काळे, ओमप्रकाश नंदगावे, राहुल साबळे आणि नरसिंह घोणे यांसारख्या स्थानिक मातब्बर चेहऱ्यांचा समावेश आहे. लातूरमधील एकूण १८ प्रभागांमधील ७० जागांसाठी होत असलेल्या या निवडणुकीत काँग्रेसने वंचित बहुजन आघाडीसोबत हातमिळवणी केली आहे, तर राष्ट्रवादीचे दोन्ही गट आणि शिवसेनेचे दोन्ही गट स्वतंत्रपणे आपले नशीब आजमावत आहेत. मतदानाच्या तोंडावर झालेल्या या मोठ्या फेरबदलामुळे प्रस्थापित पक्षांच्या गोटात अस्वस्थता पसरली असून, शिंदेंच्या या ‘धडाक्या’चा थेट फायदा शिवसेनेच्या अधिकृत उमेदवारांना मिळण्याची चिन्हे आहेत.
