Amruta Fadnavis : राज्यातील महापालिका निवडणुकांमध्ये भारतीय जनता पार्टी (भाजपा) ने जबरदस्त कामगिरी करत अनेक शहरांवर आपली पकड (Amruta Fadnavis) मजबूत केली आहे. मुंबई, पुणे, पिंपरी-चिंचवड, छत्रपती संभाजीनगर, नाशिक, नांदेड, जळगाव, धुळे, नागपूर यासह अनेक महानगरपालिकांमध्ये भाजपा सर्वात मोठा पक्ष ठरला आहे. विशेषतः मुंबई महापालिकेत (BMC) भाजपाने थेट इतिहास घडवला आहे. मुंबई महापालिका ही पारंपरिकपणे शिवसेना (ठाकरे गट) ची मजबूत पकड असलेली जागा होती. मात्र, यावेळी भाजपाने जोरदार मुसंडी मारत सर्वात मोठा पक्ष म्हणून उदयास आले. उद्धव ठाकरे आणि राज ठाकरे हे दोन्ही ठाकरे बंधू एकत्र आल्यानंतरही त्यांना फारसा फायदा झाला नाही. भाजपाच्या विकासाच्या अजेंड्याने आणि मेहनतीने मतदारांचे मन जिंकले. निकालानंतर मुख्यमंत्री देवेंद्र फडणवीस यांनी मुंबईतील भाजपा कार्यालयात हजेरी लावून कार्यकर्त्यांसोबत जल्लोष साजरा केला. त्यांनी या विजयाचे श्रेय कार्यकर्त्यांना आणि जनतेच्या विकासाच्या विश्वासाला दिले. महापौरपदाची चर्चा: अमृता फडणवीस यांचे स्पष्ट विधान निकालानंतर मुंबईच्या महापौरपदासाठी उत्सुकता शिगेला पोहोचली आहे. भाजपा आणि महायुतीच्या विजयामुळे महापौर नक्कीच महायुतीकडूनच होणार हे स्पष्ट झाले आहे. याच पार्श्वभूमीवर मुख्यमंत्री देवेंद्र फडणवीस यांच्या पत्नी अमृता फडणवीस यांनी महापौरपदाबाबत महत्त्वाचे आणि स्पष्ट मत मांडले आहे. अमृता फडणवीस म्हणाल्या, “मला आनंद आहे की, लोकांनी प्रगतीचे राजकारण स्वीकारले आहे. जात, प्रांत याप्रमाणे लोकांना वेगळे करणाऱ्या पक्षांना लोकांनी ‘वोट आऊट’ केले. आता महायुतीकडे मोठी जबाबदारी आहे. सामान्य माणसाचे जीवन सुखद करण्यासाठी काम करावे लागेल.” ठाकरे बंधू एकत्र आल्याबाबत बोलताना त्यांनी सांगितले, “मी फक्त एकच सांगेन – ते विरोधात असतील, तरी लोकांसाठी आणि लोककल्याणासाठी चांगली कामे सुरू असतील तिथे अडथळा आणू नये. जिथे टोकायचे तिथे ते नक्की टोकतील, पण चांगल्या कामांना बंदी घालू नये.” महापौरपदाबाबत त्यांनी ठामपणे सांगितले, “हिंदू बंधू किंवा भगिनी यांच्यापैकी एक महापौर असेल. मुंबईचा महापौर मराठीही असेल.” हे विधान राज ठाकरे यांच्या “मुंबईचा महापौर आमचाच आणि मराठीच होईल” या पूर्वीच्या वक्तव्याला प्रत्युत्तर देणारे ठरते. भाजपाने मुंबईवर पहिल्यांदाच इतकी मजबूत पकड मिळवली असून, महापौरपद महायुतीच्या वाट्याला येणार हे निश्चित झाले आहे. हा विजय विकास, विश्वास आणि एकतेचा आहे. मुंबईसह राज्यातील इतर महापालिकांमध्येही महायुतीची सत्ता प्रस्थापित होत असताना, आगामी काळात शहरांच्या विकासाला नवी गती मिळेल, अशी अपेक्षा लोकांकडून व्यक्त केली जात आहे.
