Zootopia 2: हॉलीवूडचा अॅनिमेटेड चित्रपट म्हटला की प्रेक्षकांची अपेक्षा आपोआप वाढतेच Zootopia 2 या अपेक्षांवर खरा उतरतो. पहिल्या सीनपासून अखेरपर्यंत कथा तुम्हाला खिळवून ठेवते, मजेदार वन-लाइनर्स सतत हसवत राहतात आणि त्यात श्रद्धा कपूरने दिलेला जूडी हॉप्सचा आवाज म्हणजे सोने पे सुहागा! कथा धरून ठेवते पहिल्या भागानंतरची गोष्ट येथे पुढे येते. जूडी हॉप्स आणि निक वाइल्ड हे जूटोपिया पोलिस विभागात पार्टनर आहेत पण त्यांच्यात तितकीशी बॉन्डिंग नाही. एका महत्त्वाच्या प्रकरणात दोघांकडून चूक होते आणि चीफ बोगो त्यांना एकतर वेगळं होण्याचा किंवा थेरपीला जाण्याचा सल्ला देतो. जूडीला वाटतं की जूटोपियात एखादा धोकादायक साप शिरला आहे, पण तिच्यावर कोणी विश्वास ठेवत नाही. ती निकला सोबत घेऊन तपास सुरू करते. याचदरम्यान शहराचे संस्थापक लिंक्सली कुटुंब एका मोठ्या पार्टीचे आयोजन करते आणि तिथेच सर्वांसमोर गैरी नावाचा साप दिसतो! आता हा साप कोण? जूटोपियात का आला? जूडी याचा उलगडा करू शकेल का? निक आणि जूडीचं नातं पुढे काय वळण घेणार? हे जाणण्यासाठी चित्रपट पाहायलाच हवा. आवाजाचा उत्तम वापर अॅनिमेटेड चित्रपटात डबिंग आर्टिस्टची भूमिका खूप महत्त्वाची असते. Zootopia 2 मध्ये प्रत्येक पात्राचा आवाज सुंदरपणे बसलेला आहे. श्रद्धा कपूरचा जूडीसाठी दिलेला आवाज कॉमिक सीन असो वा इमोशनल, अगदी परफेक्ट आहे! निक वाइल्डचा आवाज दमनदीप सिंहने अप्रतिमरित्या साकारला आहे. त्यांची कॉमेडी टाइमिंग भन्नाट आहे. समय ठक्कर, आदित्य राज शर्मा आणि इतरांनीही आपल्या भूमिकांना जबरदस्त न्याय दिला आहे. हिंदी संवादांची चमक हिंदी डायलॉग रायटर्सने अप्रतिम काम केले आहे. संवाद इतके नेमके आणि मजेदार आहेत की कधीही डब केलेला चित्रपट पाहतोय असे वाटत नाही. काही वन-लाइनर्स तर प्रेक्षकांना सतत हसवत राहतात. विविध भाषांचे अॅक्सेंट, मजेदार टोन या सर्वामुळे चित्रपट अजून मजेशीर बनतो. दिग्दर्शन जॅरेड बुश आणि बायरन हावर्ड यांनी चित्रपटातील प्रत्येक लहान-मोठा सीन अत्यंत बारीकसारीकपणे डिझाइन केला आहे. पात्रांची संख्या जास्त असूनही प्रेक्षक कधीही गोंधळत नाहीत किंवा कंटाळत नाहीत हे दिग्दर्शनाचे मोठे यश आहे. पाहावा की नाही? नक्कीच पाहावा! विशेषतः थिएटरमध्ये पाहण्याचा अनुभव तर वेगळाच आहे. लहानांपासून मोठ्यांपर्यंत संपूर्ण कुटुंबाने एकत्र पाहण्यासाठी उत्तम चित्रपट.
