Vidya Balan : दाक्षिणात्य सुपरस्टार रजनीकांत वयाच्या ७५व्या वर्षीही तितक्याच जोमाने काम करताना दिसतात. सध्या ते त्यांच्या बहुचर्चित चित्रपट ‘जेलर २’च्या शूटिंगमध्ये व्यस्त आहेत. अशातच या चित्रपटाबाबत एक मोठी आणि उत्सुकता वाढवणारी बातमी समोर आली आहे. दिग्दर्शक नेल्सन दिलीपकुमार यांच्या दिग्दर्शनाखाली २०२३ मध्ये प्रदर्शित झालेल्या ‘जेलर’ चित्रपटाला प्रेक्षकांचा प्रचंड प्रतिसाद मिळाला होता. या चित्रपटाने बॉक्स ऑफिसवर जगभरात ६०० कोटींपेक्षा जास्त कमाई केली होती. या यशानंतर आता ‘जेलर २’ येत असल्याने चाहत्यांमध्ये उत्साह आहे. विद्या बालन साकारणार महत्त्वाची भूमिका आता मिळालेल्या माहितीनुसार, या चित्रपटात बॉलिवूड अभिनेत्री विद्या बालन झळकणार आहे. माध्यमांच्या वृत्तानुसार विद्याने नुकताच हा चित्रपट साइन केला असून तिला चित्रपटाची कथा खूप आवडली आहे. ‘जेलर २’मध्ये ती एका महत्त्वपूर्ण भूमिकेत दिसणार असून तिच्या भूमिकेमुळे कथेला वेगळं वळण मिळणार असल्याचं सांगितलं जात आहे. मात्र, तिच्या भूमिकेचं नाव अद्याप जाहीर करण्यात आलेलं नाही. १४ ऑगस्ट २०२६ रोजी चित्रपट होणार प्रदर्शित ‘न्यूज १८’च्या वृत्तानुसार, ‘जेलर २’ १४ ऑगस्ट २०२६ रोजी प्रदर्शित होणार आहे. या चित्रपटाचं शूटिंग १० मार्च २०२५ रोजी चेन्नईमध्ये सुरू झालं होतं. त्यानंतर गोव्यातही चित्रीकरण करण्यात आलं असून आता जवळपास संपूर्ण शूटिंग पूर्ण होत आले आहे. हे दोन दिग्गज कलाकारही असणार चित्रपटात रजनीकांत आणि विद्या बालनसोबतच या चित्रपटात दाक्षिणात्य सुपरस्टार मोहनलाल यांचाही सहभाग असणार असल्याची चर्चा आहे. याशिवाय, ज्येष्ठ बॉलिवूड अभिनेते मिथुन चक्रवर्ती देखील ‘जेलर २’मध्ये झळकणार असल्याचं म्हटलं जात आहे. एकूणच, दमदार स्टारकास्ट आणि यशस्वी पहिल्या भागानंतर ‘जेलर २’कडून प्रेक्षकांना मोठ्या अपेक्षा आहेत.
