Shilpa Shetty : मुंबईत गुरुवारी (१८ डिसेंबर) आयकर विभागाने अनेक फूड आणि बेव्हरेज कंपन्यांवर करचुकवेगिरीच्या संशयावरून छापे टाकले. या कारवाईत अभिनेत्री शिल्पा शेट्टीशी संबंधित एका रेस्टॉरंटचाही समावेश आहे. वृत्तसंस्था पीटीआयने दिलेल्या माहितीनुसार, मुंबई आणि परिसरात सुमारे २० ते २४ ठिकाणी आयकर विभागाची तपासणी सुरू आहे. या क्षेत्रातील काही कंपन्यांविरोधात ठोस माहिती मिळाल्यानंतर ही कारवाई करण्यात आली. सूत्रांनी सांगितले की, शिल्पा शेट्टी आणि इतर काही व्यक्तींच्या मालकीच्या एका रेस्टॉरंटच्या कार्यालयांवर छापा टाकण्यात आला आहे. मात्र, शिल्पा शेट्टी यांच्या मुंबईतील निवासस्थानी कोणताही छापा टाकण्यात आलेला नाही, असेही स्पष्ट करण्यात आले आहे. आयकर विभागाने सांगितले की, ही तपासणी महाराष्ट्र पोलिसांनी शिल्पा शेट्टी आणि त्यांचे पती राज कुंद्रा यांच्याविरोधात नोंदवलेल्या कथित ६० कोटी रुपयांच्या फसवणूक प्रकरणाशी संबंधित नाही. तसेच बेंगळुरूमधील एका रेस्टॉरंटविरोधात उशिरापर्यंत व्यवसाय केल्याच्या आरोपांशीही या कारवाईचा काहीही संबंध नाही. दरम्यान, बेंगळुरूमधील संबंधित रेस्टॉरंटमध्ये शिल्पा शेट्टी सह-मालक असल्याचे सांगितले जाते. याशिवाय शिल्पा शेट्टी आणि राज कुंद्रा हे ६० कोटी रुपयांच्या कथित फसवणूक प्रकरणामुळे आधीपासूनच कायदेशीर वादात आहेत. अलीकडेच राज कुंद्रा यांनी सोशल मीडियावर पोस्ट शेअर करून आरोप फेटाळले असून, आपण तपासात पूर्ण सहकार्य करत असल्याचे सांगितले आहे. शिल्पा शेट्टी यांनीही या प्रकरणावर प्रतिक्रिया देत, संबंधित कंपनीत आपली भूमिका मर्यादित आणि गैर-कार्यक्षम स्वरूपाची असल्याचे स्पष्ट केले आहे.
