Mouni Roy: देवीपासून नागिनपर्यंत… मौनी रॉयचा भन्नाट प्रवास; ३ कोटींहून अधिक चाहत्यांची आवडती अभिनेत्री

Mouni Roy: मौनी रॉय सध्या तिच्या वैयक्तिक आयुष्यामुळे चर्चेत आहे. चार वर्षांपूर्वी उद्योगपती सूरज नांबियार यांच्यासोबत लग्न केलेल्या मौनीने आता वेगळं होण्याचा निर्णय घेतल्याचं सोशल मीडिया वर जाहीर केलं आहे. मात्र या चर्चांदरम्यान तिच्या अभिनय कारकिर्दीचीही जोरदार चर्चा होत आहे. छोट्या पडद्यापासून बॉलिवूडपर्यंतचा तिचा प्रवास खूपच खास राहिला आहे.

आज सोशल मीडियावर मौनी रॉय ची जबरदस्त लोकप्रियता आहे. इन्स्टाग्रामवर तिला तब्बल ३ कोटी ३० लाखांहून अधिक लोक फॉलो करतात. तिच्या स्टाइल, अभिनय आणि डान्समुळे ती नेहमीच चाहत्यांच्या चर्चेत असते. ( Mouni Roy)

मौनीने २००७ मध्ये ‘क्योंकि सास भी कभी बहू थी’ या लोकप्रिय मालिकेतून अभिनय क्षेत्रात पदार्पण केलं. या मालिकेत तिने ‘कृष्णा तुलसी’ ही भूमिका साकारली होती. तिच्या अभिनयाला प्रेक्षकांनी मोठी पसंती दिली आणि ती घराघरात प्रसिद्ध झाली.

यानंतर मौनीने अनेक वेगवेगळ्या भूमिका साकारल्या. पण तिच्या कारकिर्दीतील सर्वात खास गोष्ट म्हणजे तिने सकारात्मक आणि नकारात्मक अशा दोन्ही प्रकारच्या भूमिका यशस्वीपणे साकारल्या. देवीची भूमिका असो किंवा नागिनची, दोन्ही रूपांत तिने प्रेक्षकांची मनं जिंकली.

‘देवों के देव: महादेव’ या मालिकेत मौनीने माता सतीची भूमिका केली होती. भगवान शंकरांच्या पहिल्या पत्नीची ही भूमिका प्रेक्षकांना खूप आवडली. या मालिकेमुळे मौनीला मोठी लोकप्रियता मिळाली आणि ती घराघरात ‘देवी’ म्हणून ओळखली जाऊ लागली. या मालिकेतील तिचा साधेपणा आणि अभिनय आजही प्रेक्षकांच्या लक्षात आहे.

यानंतर एकता कपूर यांच्या ‘नागिन’ मालिकेत मौनी नागिनच्या भूमिकेत दिसली. या मालिकेने तिच्या कारकिर्दीला मोठी उंची मिळवून दिली. ‘नागिन’मधील तिची स्टाइल, अभिनय आणि स्क्रीन प्रेझेन्स प्रेक्षकांना प्रचंड आवडली. या मालिकेनंतर मौनी टीव्ही इंडस्ट्रीतील सर्वात लोकप्रिय अभिनेत्रींपैकी एक बनली.

छोट्या पडद्यावर यश मिळवल्यानंतर मौनीने बॉलिवूड मध्येही पाऊल ठेवलं. अक्षय कुमार यांच्या गोल्ड चित्रपटातून तिने मुख्य अभिनेत्री म्हणून बॉलिवूडमध्ये पदार्पण केलं. त्यानंतर तिने अनेक चित्रपट आणि वेब प्रोजेक्ट्समध्ये काम केलं.

आज मौनी रॉय ही फक्त अभिनेत्री नाही, तर फॅशन आणि सोशल मीडिया आयकॉन म्हणूनही ओळखली जाते. तिचा ग्लॅमरस अंदाज आणि विविध भूमिका साकारण्याची क्षमता यामुळे ती नेहमीच चर्चेत राहते.