Farah Khan Birthday: आज बॉलिवूडमधील प्रसिद्ध कोरिओग्राफर, दिग्दर्शिका आणि कंटेंट क्रिएटर फराह खान आपला ६१वा वाढदिवस साजरा करत आहेत. ९ जानेवारी १९६५ रोजी जन्मलेल्या फराह खान गेली सुमारे ४० वर्षे बॉलिवूडमध्ये सक्रिय आहेत. स्वतःच्या संघर्षातून त्यांनी मोठे यश मिळवलेच, पण अनेक कलाकारांना पुढे नेण्यातही त्यांचा मोठा वाटा आहे. दीपिका पादुकोणला दिली मोठी संधी आज बॉलिवूडमधील आघाडीची अभिनेत्री असलेल्या दीपिका पादुकोणला मोठ्या पडद्यावर आणण्याचे श्रेय फराह खान यांनाच जाते. ‘ओम शांती ओम’ (२००७) या चित्रपटातून फराह खान यांनी दीपिकाला शाहरुख खानसोबत लॉन्च केले. हा चित्रपट दीपिकाच्या करिअरसाठी टर्निंग पॉइंट ठरला. त्यानंतर ‘हॅपी न्यू ईयर’मध्येही फराहने दीपिका-शाहरुखची जोडी पुन्हा एकत्र आणली. मलायका अरोडाला आयटम डान्स क्वीन बनवले मलायका अरोडाच्या करिअरमधील सर्वात गाजलेली गाणी फराह खान यांनीच कोरिओग्राफ केली. ‘दिल से’मधील ‘छैय्या छैय्या’ आणि ‘दबंग’मधील ‘मुन्नी बदनाम हुई’ या गाण्यांमुळे मलायकाला प्रचंड लोकप्रियता मिळाली. आजही या गाण्यांमुळे मलायकाची ओळख कायम आहे. कॅटरीना कैफच्या डान्सिंग टॅलेंटला मिळाली ओळख फराह खान यांनी कॅटरीना कैफच्या अभिनयापेक्षा तिच्या नृत्यकौशल्यावर अधिक भर दिला. ‘तीस मार खान’मधील ‘शीला की जवानी’ आणि ‘अग्निपथ’मधील ‘चिकनी चमेली’ या गाण्यांमुळे कॅटरीनाची डान्सर म्हणून खास ओळख निर्माण झाली. गीता कपूरच्या करिअरची घडण आज प्रसिद्ध कोरिओग्राफर असलेल्या गीता कपूर यांनी करिअरची सुरुवात फराह खान यांच्या सहाय्यक म्हणून केली होती. अनेक हिट चित्रपटांमध्ये त्यांनी फराहसोबत काम केले. गीता कपूर फराह खान यांना आपली मार्गदर्शक आणि दुसरी आई मानतात. घरच्या कुक दिलीपलाही दिली ओळख बॉलिवूडपुरतेच मर्यादित न राहता फराह खान यांनी आपल्या घरच्या कुक दिलीपलाही प्रसिद्धी मिळवून दिली. फराहच्या यूट्यूब कुकिंग चॅनलमुळे दिलीप सोशल मीडियावर लोकप्रिय झाला. स्वतः फराह खान यांनीही कंटेंट क्रिएटर म्हणून नवी ओळख निर्माण केली आहे. शाहरुख खानच्या करिअरला दिला वेगळा आयाम ‘मैं हूं ना’ आणि ‘ओम शांती ओम’ या फराह खान दिग्दर्शित चित्रपटांनी शाहरुख खानच्या करिअरला वेगळी दिशा दिली. हे चित्रपट शाहरुखच्या करिअरमधील खास चित्रपट मानले जातात. फराह आणि शाहरुख यांची मैत्रीही बॉलिवूडमध्ये प्रसिद्ध आहे. एकूणच पाहता, अभिनेत्री, डान्सर, कोरिओग्राफर ते घरच्या कुकपर्यंत अनेकांच्या आयुष्यात यशाची चमक आणण्याचे काम फराह खान यांनी केले आहे. स्वतःही उत्तम दिग्दर्शिका, कोरिओग्राफर आणि कंटेंट क्रिएटर म्हणून त्यांनी आपली वेगळी ओळख निर्माण केली आहे.
