Diljit Dosanjh Birthday: पंजाबी संगीत आणि चित्रपटसृष्टीत आज दिलजीत दोसांझ हे एक मोठं नाव आहे. गायक, अभिनेता आणि परफॉर्मर म्हणून त्यांनी केवळ भारतातच नाही, तर जगभरात आपली ओळख निर्माण केली आहे. पण या यशामागे खूप संघर्ष आणि अतिशय साधी सुरुवात दडलेली आहे. दिलजीत दोसांझ यांचा जन्म ६ जानेवारी १९८४ रोजी पंजाबमधील जालंधर जिल्ह्यातील दोसांझ कलां या गावात झाला. त्यांचं कुटुंब आर्थिकदृष्ट्या फारसं सक्षम नव्हतं. मात्र, मेहनत, प्रामाणिकपणा आणि संस्कारांची शिकवण त्यांना लहानपणापासून मिळाली. शिक्षण घेत असतानाच त्यांचा ओढा संगीताकडे वाढू लागला. दिलजीत यांनी आपल्या संगीत प्रवासाची सुरुवात गुरुद्वार्यात कीर्तन गाण्यापासून केली. तिथे त्यांच्या आवाजाने सगळ्यांचं लक्ष वेधून घेतलं. याच काळात त्यांना कळलं की संगीत हाच त्यांच्या आयुष्याचा खरा मार्ग आहे. पुढे त्यांनी छोट्या कार्यक्रमांमध्ये आणि लग्नसमारंभांत गाणं सुरू केलं. २००३ साली ‘इश्क दा उड़ा अड़ा’ हा त्यांचा पहिला म्युझिक अल्बम प्रदर्शित झाला. या अल्बममुळे त्यांना पंजाबी संगीतसृष्टीत ओळख मिळाली. त्यानंतर ‘पटियाला पैग’, ‘प्रॉपर पटोला’, ‘स्माईल’ यांसारख्या अनेक हिट गाण्यांमुळे ते सुपरस्टार बनले. संगीतासोबतच अभिनयातही दिलजीत दोसांझ यांनी आपली छाप पाडली. २०११ मध्ये ‘द लायन ऑफ पंजाब’ या चित्रपटातून त्यांनी अभिनयाची सुरुवात केली. ‘जट्ट अँड जूलिएट’, ‘अंबरसरिया’ आणि ‘सुपर सिंह’ या चित्रपटांनी त्यांना पंजाबी सिनेमाचा मोठा स्टार बनवलं. २०१६ मध्ये ‘उडता पंजाब’ या चित्रपटातून त्यांनी बॉलिवूडमध्ये प्रवेश केला आणि या भूमिकेसाठी त्यांना फिल्मफेअर पुरस्कारही मिळाला. आज दिलजीत दोसांझ आंतरराष्ट्रीय पातळीवर भारताचं नाव उज्ज्वल करत आहेत. अमेरिका, कॅनडा आणि युरोपमध्ये त्यांचे कॉन्सर्ट्स हाऊसफुल असतात. याशिवाय ते समाजसेवेतही सक्रिय आहेत. त्यांच्या ‘सांझ फाउंडेशन’मार्फत मुलं आणि ज्येष्ठ नागरिकांसाठी विविध उपक्रम राबवले जातात. गुरुद्वार्यातील कीर्तनापासून ते जागतिक मंचापर्यंतचा दिलजीत दोसांझ यांचा प्रवास आजच्या तरुणांसाठी नक्कीच प्रेरणादायी आहे.
