Alpha Movie: यशराज फिल्म्सच्या स्पाय युनिव्हर्समधील बहुचर्चित चित्रपट ‘अल्फा’ संदर्भात गेल्या काही दिवसांपासून ओटीटी रिलीजबाबत अनेक चर्चा रंगल्या होत्या. काही रिपोर्ट्सनुसार हा चित्रपट थेट डिजिटल प्लॅटफॉर्मवर प्रदर्शित होणार असल्याची शक्यता व्यक्त केली जात होती. मात्र आता या सर्व अफवांना पूर्णविराम मिळाला आहे. ‘अल्फा’ हा चित्रपट केवळ सिनेमागृहातच प्रदर्शित होणार असल्याचे स्पष्ट झाले आहे. ‘अल्फा’मध्ये आलिया भट्ट, शरवरी वाघ आणि बॉबी देओल मुख्य भूमिकेत दिसणार आहेत. या चित्रपटाबाबत प्रेक्षकांमध्ये आधीपासूनच मोठी उत्सुकता आहे. दरम्यान, नेटफ्लिक्स इंडियाकडून या चित्रपटासाठी थेट डिजिटल रिलीजसाठी तब्बल २१५ कोटी रुपयांची ऑफर देण्यात आल्याची चर्चा होती. ही रक्कम ऐकून संपूर्ण इंडस्ट्रीत खळबळ उडाली होती. मात्र इतक्या मोठ्या ऑफरनंतरही यशराज फिल्म्सने ती नाकारत चित्रपट थिएटरमध्येच प्रदर्शित करण्याचा निर्णय घेतला. Alia Bhatt’s ‘Alpha’ यशराज फिल्म्सच्या प्रवक्त्यांनी स्पष्ट केले की, ‘अल्फा’ थेट ओटीटीवर येणार असल्याच्या बातम्या केवळ अफवा आहेत. कंपनीची परंपरा मोठे आणि महत्त्वाचे चित्रपट प्रथम मोठ्या पडद्यावरच प्रदर्शित करण्याची आहे. ‘अल्फा’ हा त्यांच्या स्पाय युनिव्हर्समधील महत्त्वाचा भाग असल्यामुळे तो थिएटरमध्येच रिलीज होणार आहे. या चित्रपटाच्या रिलीज डेटबाबतही बदल झाले आहेत. सुरुवातीला ‘अल्फा’ २५ डिसेंबरला प्रदर्शित होणार होता. मात्र व्हिज्युअल इफेक्ट्स आणि पोस्ट-प्रॉडक्शनच्या कामाला वेळ लागल्याने तारीख पुढे ढकलण्यात आली. त्यानंतर १७ एप्रिल २०२६ ही नवी रिलीज डेट जाहीर करण्यात आली. मात्र एप्रिल महिन्यात सलमान खानचा ‘बॅटल ऑफ गलवान’ हा चित्रपटही प्रदर्शित होण्याची शक्यता असल्याने बॉक्स ऑफिसवर मोठी टक्कर पाहायला मिळू शकते. यशराज फिल्म्सचा स्पाय युनिव्हर्स यापूर्वीही अनेक ब्लॉकबस्टर चित्रपट देऊन गाजला आहे. त्यामुळे ‘अल्फा’कडूनही प्रेक्षकांच्या अपेक्षा मोठ्या आहेत. या चित्रपटाचे दिग्दर्शन शिव रवैल यांनी केले आहे. दमदार अॅक्शन, मोठा स्टारकास्ट आणि भव्य मांडणी यामुळे ‘अल्फा’ हा २०२६ मधील मोठा चित्रपट ठरण्याची शक्यता व्यक्त केली जात आहे. ओटीटीवरील चर्चांनंतर आता हे स्पष्ट झाले आहे की ‘अल्फा’ मोठ्या पडद्यावरच प्रेक्षकांना पाहायला मिळणार आहे. त्यामुळे चाहत्यांमध्ये उत्सुकता आणखी वाढली आहे.
