Akshay Khanna: बॉलिवूडमधील प्रतिभावान पण अनेकदा दुर्लक्षित राहिलेला अभिनेता अक्षय खन्ना आज आपला ५१वा वाढदिवस साजरा करत आहे. २८ मार्च १९७५ रोजी मुंबईत जन्मलेल्या अक्षय खन्नाने आपल्या अभिनयाच्या जोरावर इंडस्ट्रीत वेगळी ओळख निर्माण केली. मात्र, काही काळासाठी तो अचानक चित्रपटांपासून दूर गेला होता. आता त्याने पुन्हा दमदार कमबॅक करत चाहत्यांना आश्चर्यचकित केलं आहे. Akshay Khanna अक्षय खन्ना हा दिग्गज अभिनेता विनोद खन्ना यांचा मुलगा आहे. वडिलांप्रमाणेच त्यानेही अभिनय क्षेत्रात आपली छाप सोडली. मात्र, त्याचा सुरुवातीचा प्रवास सोपा नव्हता. वयाच्या १९व्या वर्षी त्याला केस गळण्याची समस्या सुरू झाली, ज्यामुळे तो मानसिकदृष्ट्या खूप अस्वस्थ झाला होता. पण त्याने ही गोष्ट स्वीकारली आणि आत्मविश्वासाने पुढे वाटचाल केली. Akshay Khanna १९९७ मध्ये ‘हिमालय पुत्र’ या चित्रपटातून त्याने बॉलिवूडमध्ये पदार्पण केलं. हा चित्रपट फारसा यशस्वी झाला नाही, पण त्याच वर्षी आलेल्या ‘बॉर्डर’ या चित्रपटाने त्याला खरी ओळख मिळवून दिली. या चित्रपटातील ‘धर्मवीर’ ही त्याची भूमिका प्रेक्षकांच्या मनात घर करून गेली. Akshaye Khanna यानंतर अक्षय खन्नाने अनेक हिट चित्रपट दिले. २००१ मध्ये आलेल्या ‘दिल चाहता है’ या चित्रपटाने त्याच्या करिअरला नवं वळण दिलं. ‘सिड’ या शांत, संवेदनशील आणि भावनिक भूमिकेत त्याने वेगळ्या प्रकारचा हिरो साकारला. या भूमिकेसाठी त्याला फिल्मफेअर पुरस्कारही मिळाला. मात्र, ‘हमराज’, ‘हंगामा’ आणि ‘रेस’ सारख्या चित्रपटांनंतर तो अचानक इंडस्ट्रीपासून दूर गेला. २०१२ ते २०१६ या काळात तो जवळपास चार वर्षे मोठ्या पडद्यावर दिसलाच नाही. त्यामुळे त्याच्या करिअरबाबत अनेक प्रश्न निर्माण झाले आणि त्याचा प्रवास संपल्याची चर्चा सुरू झाली. पण २०१७ मध्ये त्याने जबरदस्त पुनरागमन केलं. ‘इत्तेफाक’ आणि ‘मॉम’ या चित्रपटांमधून त्याने पुन्हा आपली अभिनय क्षमता सिद्ध केली. त्यानंतर ‘दृश्यम २’ मध्ये साकारलेल्या पोलीस अधिकाऱ्याच्या भूमिकेमुळे त्याने पुन्हा प्रेक्षकांची मनं जिंकली. Akshay Khanna २०२५ हे वर्ष अक्षय खन्नासाठी खास ठरलं. दिग्दर्शक आदित्य धर यांच्या ‘धुरंधर’ चित्रपटात त्याने ‘रहमान डकेत ’ची भीतीदायक भूमिका साकारली, ज्याने प्रेक्षकांना थक्क केलं. त्याचबरोबर ‘छावा’ चित्रपटातील ‘औरंगजेब’च्या भूमिकेतही त्याने आपली वेगळी छाप सोडली आणि समीक्षकांकडूनही प्रशंसा मिळवली. अक्षय खन्नाचा हा प्रवास खूप प्रेरणादायी आहे. काही काळ अपयश आणि विश्रांती घेतल्यानंतरही त्याने हार मानली नाही. त्याने योग्य संधीची वाट पाहिली आणि ती मिळताच आपल्या अभिनयाने पुन्हा एकदा सिद्ध केलं की खरा कलाकार कधीच संपत नाही.
