Gold-Silver Prices: अमेरिकेच्या डोनाल्ड ट्रम्प प्रशासनाने इराणविरुद्धचे युद्ध एक महिन्यापेक्षा जास्त लांबू शकते असे सूचित केल्यानंतर वायदे बाजारात सोने आणि चांदीचे दर वेगाने वाढत आहेत. सध्याच्या परिस्थितीत आपली गुंतवणूक सुरक्षित राहावी यासाठी डॉलर बरोबरच सोने आणि चांदीचा गुंतवणूकदार आधार घेत असल्याचे वातावरण जागतिक आणि भारतीय वायदे बाजारात आहे. मंगळवारी सोने आणि चांदीपेक्षा डॉलर गुंतवणुकीसाठी योग्य राहील असे वाटल्यामुळे वायदे बाजारात या दोन धातूच्या दरात फारसी वाढ झाली नव्हती. मात्र बुधवारी पुन्हा या दोन धातूंची मागणी वाढली आहे. दिल्ली सराफात होळीनिमित्त व्यवहार बंद होते. त्यामुळे स्पॉट मार्केटमधील दर उपलब्ध होऊ शकले नाहीत. बुधवारी मल्टी कमोडिटी एक्सचेंजवर मे महिन्याच्या पुरवठ्याची चांदी 6,410 रुपयांनी म्हणजे 2.42 टक्क्यांनी वाढून 2 लाख 71 हजार 728 रुपये प्रति किलोग्राम झाली. एक वेळ या चांदीचा दर 3.21 टक्क्यापर्यंत वाढला होता. मात्र नंतर तो काही प्रमाणात कमी झाला. हेही वाचा: आखाती युद्धाने तेल 83 डॉलरवर; भारतात महागाई, कर्जरोखे परतावा तीन आठवड्यांच्या उच्चांकावर बुधवारी एप्रिल मधील पुरवठ्याच्या सोन्याचा भाव 1.16 टक्क्यांनी म्हणजे 1,872 रुपयांनी वाढून 1 लाख 62 हजार 980 रुपये प्रति दहा ग्रॅम या पातळीवर गेला होता. या घटनाक्रमाबद्दल चॉईस ब्रोकिंग कंपनीचे विश्लेषक अमीर मकडा यांनी सांगितले की, भूराजकीय तणावामुळे बुधवारी सोने आणि चांदीच्या दरात वायदे बाजारात अपेक्षेप्रमाणे वाढ झाली आहे. याच प्रमाणात स्पॉट मार्केटमध्येही वाढ अपेक्षित आहे. हा प्रकार केवळ भारतीय वायदे बाजारातच नाही तर जागतिक वायदे बाजारातही घडत असल्याचे दिसून येत आहे. भारताबरोबरच जागतिक वायदे बाजारातही सोने आणि चांदीचे दर वाढत आहेत. त्याचबरोबर डॉलर केंद्री वित्तीय उत्पादनाचे दरही वाढत आहेत. जागतिक वायदे बाजारात चांदी 2.7 टक्क्यांनी वाढून 85.20 डॉलरवर गेली आहे. तर सोने 1.01 टक्क्यांनी वाढून 5,178 डॉलर प्रति औंसावर गेले आहे. युद्ध लांबल्यास डॉलर जास्त आधार देऊ शकतो. कारण महागाई वाढल्यानंतर अमेरीकन रिझर्व व्याजदर कपात लांबणवर टाकू शकते असे गुंतवणूकदारांना वाटत असल्यामुळे डॉलरमध्ये मोठ्या प्रमाणात गुंतवणूक वाढत आहे. सोन्यामध्ये आणखी काही काळ वाढीची क्षमता आहे. मात्र चांदीचे दर सध्याच्या पातळीवर कमी -अधिक प्रमाणात स्थिरावू शकतात असे समजले जाते.
