Share Market Falls: भारतीय शेअर बाजारासाठी आजचा शुक्रवार ‘ब्लॅक फ्रायडे’ ठरला आहे. चौफेर विक्रीच्या दबावामुळे बाजारात मोठी घसरण पाहायला मिळाली. दिवसभराच्या व्यवहाराअंती मुंबई शेअर बाजाराचा निर्देशांक ‘सेन्सेक्स’ ७६९.६६ अंकांनी (०.९४%) कोसळून ८१,५३७.७० वर बंद झाला. तर, राष्ट्रीय शेअर बाजाराचा ‘निफ्टी’ २४१.२५ अंकांनी (०.९५%) घसरून २५,०४८.६५ च्या पातळीवर स्थिरावला. या पडझडीमुळे गुंतवणूकदारांचे एकाच दिवसात तब्बल ६.९२ लाख कोटी रुपये मातीमोल झाले आहेत. सलग सुरू असलेल्या विक्रीच्या सत्रामुळे गुंतवणूकदारांमध्ये भीतीचे वातावरण पसरले असून, सेन्सेक्सने या एकाच आठवड्यात तब्बल २,००० अंकांची घसरण नोंदवली आहे. विदेशी गुंतवणूकदारांची सततची विक्री, कंपन्यांचे कमकुवत तिमाही निकाल आणि रुपयाची ऐतिहासिक घसरण यांमुळे बाजाराचा मूड बिघडला आहे. मिडकॅप आणि स्मॉलकॅपमध्ये ‘हाहाकार’ मोठ्या शेअर्ससह छोट्या आणि मध्यम कंपन्यांच्या शेअर्समध्येही मोठी विक्री झाली. बीएसई मिडकॅप १.५६ टक्क्यांनी, तर स्मॉलकॅप २.१९ टक्क्यांनी घसरला. रिअल्टी आणि युटिलिटी क्षेत्रातील शेअर्सना सर्वाधिक फटका बसला असून हे निर्देशांक ३ टक्क्यांहून अधिक तुटले. सार्वजनिक क्षेत्रातील बँका (PSU Banks), कॅपिटल गुड्स आणि पॉवर शेअर्समध्येही २ टक्क्यांहून अधिक घसरण नोंदवण्यात आली. शेअर बाजाराची आजची स्थिती कोणाला फायदा, कोणाला फटका? टॉप लूजर्स: सेन्सेक्समध्ये अदानी पोर्ट्सचे शेअर्स सर्वाधिक ७.५२ टक्क्यांनी घसरले. त्याखालोखाल इंडिगो, ॲक्सिस बँक आणि बजाज फिनसर्व्हचे शेअर्स लाल निशाणीत बंद झाले. टॉप गेनर्स: पडझडीच्या काळातही आयटी क्षेत्रातील शेअर्सनी काहीसा आधार दिला. टेक महिंद्रा (०.७९%), हिंदुस्थान युनिलिव्हर, इन्फोसिस, एशियन पेंट्स आणि टीसीएसचे शेअर्स किरकोळ वाढीसह बंद झाले. बाजारात भूकंप येण्याची ७ मुख्य कारणे: १. परदेशी गुंतवणूकदारांकडून (FII) मोठी विक्री: जानेवारी महिन्यात आतापर्यंत विदेशी गुंतवणूकदारांनी सुमारे ३६,००० कोटी रुपये काढून घेतले आहेत. सलग १३ व्या दिवशी ही विक्री सुरू असल्याने बाजारात पैशांचा ओघ आटला आहे. २. तिमाही निकालांची निराशा: आयसीआयसीआय बँक आणि एचसीएल टेक सारख्या बड्या कंपन्यांचे निकाल अपेक्षेप्रमाणे न लागल्याने गुंतवणूकदारांनी बँकिंग आणि आयटी शेअर्समध्ये मोठी विक्री केली. ३. कच्च्या तेलाच्या किमतीत वाढ: आंतरराष्ट्रीय बाजारात ब्रेंट क्रूडचे दर वाढून ६४.५७ डॉलर प्रति बॅरलवर पोहोचले आहेत. यामुळे महागाई वाढण्याची भीती निर्माण झाली असून त्याचा बाजारावर नकारात्मक परिणाम झाला आहे. ४. जागतिक राजकीय अनिश्चितता: ग्रीनलँडच्या मुद्द्यावरून अमेरिकेचे राष्ट्राध्यक्ष डोनाल्ड ट्रम्प यांची भूमिका आणि अमेरिका-युरोपमधील व्यापार तणावामुळे जागतिक गुंतवणूकदार सावध पावले उचलत आहेत. ५. अदाणी समूहाच्या शेअर्समध्ये घसरण: अमेरिकन एसईसी (SEC) कडून कथित लाचखोरी प्रकरणी गौतम अदाणी आणि सागर अदाणी यांना समन्स बजावण्याच्या हालचाली सुरू झाल्या आहेत. या बातमीमुळे अदाणी ग्रुपच्या शेअर्समध्ये जोरदार विक्री झाली. ६. बँकिंग क्षेत्रावर दबाव: पंजाब नॅशनल बँक आणि येस बँक यांसारख्या शेअर्समध्ये कमजोरी दिसून आल्याने ‘बँक निफ्टी’ १ टक्क्याने घसरला, ज्याचा फटका संपूर्ण बाजाराला बसला. ७. रुपयाची ऐतिहासिक नीचांकी पातळी: अमेरिकन डॉलरच्या तुलनेत भारतीय रुपया ४१ पैशांनी घसरून ९१.९९ या नव्या ऐतिहासिक नीचांकी स्तरावर पोहोचला आहे. यामुळे विदेशी भांडवल बाहेर जाण्याचा वेग अधिक वाढला आहे. दरम्यान, बाजार विश्लेषकांच्या मते, जोपर्यंत भू-राजकीय तणाव कमी होत नाही आणि विदेशी गुंतवणूकदारांची विक्री थांबत नाही, तोपर्यंत बाजारात अस्थिरता कायम राहू शकते.
