Stock Market Crash: आखातातील युद्ध सुरू झाल्यापासून चीन वगळता इतर देशातील शेअर बाजाराचे निर्देशांक कमी होत होते. आज त्यामध्ये चीनचाह समावेश झाला आहे. इराणने आपली भूमिका अधिक आक्रमक केली असल्यामुळे युद्ध चिघळण्याची शक्यता आहे. अशा परिस्थितीत जागतिक शेअर बाजारावर नकारात्मक परिणाम झाला. दक्षिण कोरियातील शेअर बाजाराचा मुख्य निर्देशांक सोमवारी सहा टक्क्यांनी कोसळला. जपानमधील शेअर बाजाराचा निर्देशांक पाच टक्क्यांनी कोसळला. चीन आणि हाँगकाँगमधील शेअर बाजाराचे निर्देशांक सोमवारी कोसळले. युरोपमधील बहुतांश देशाच्या शेअर बाजाराचे निर्देशांक सोमवारी कमी पातळीवर होते. अमेरिकेने इराणविरोधात हल्ला करूनही अमेरिकन शेअर बाजाराचे आतापर्यंत जास्त नुकसान झाले नव्हते. मात्र आता युद्ध जास्त चिघळण्याची शक्यता वाढल्यामुळे अमेरिकेतील माहिती तंत्रज्ञान कंपन्यासह इतर कंपन्यांच्या शेअरची विक्री वाढून अमेरिकेतील शेअर बाजाराचे निर्देशांक ही कमी झाले. भारतीय शेअर निर्देशांक कोसळले दोन टक्क्यांनी – आखातातील युद्ध सुरू होऊन आठवडा उलटला आहे. तेथील युद्ध शमण्याऐवजी वाढण्याची लक्षणे जास्त आहेत. अशा परिस्थितीत खनिज तेलाचे दर वाढले आहेत. त्याचबरोबर नैसर्गिक वायूचा तुटवडा निर्माण झाला आहे. अशा परिस्थितीत विक्री होऊन शेअर बाजाराचे निर्देशांक सोमवारी दोन टक्क्यांनी कोसळले. मुंबई शेअर बाजाराचा निर्देशांक सेन्सेक्स 1,352 अंकांनी म्हणजे 1.71 टक्क्यांनी कोसळून 77,566 अंकावर बंद झाला. राष्ट्रीय शेअर बाजाराचा निर्देशांक निफ्टी 422 अंकांनी म्हणजे 1.73 टक्क्यांनी कोसळून 24,028 अंकावर बंद झाला. 4,379 कंपन्यांच्या शेअरचे भाव घसरले तर 972 कंपन्यांच्या शेअरचे भाव वाढले. जिओजीत इन्वेस्टमेंट या कंपनीचे संशोधन प्रमुख विनोद नायर यांनी सांगितले की इराण माघार घेण्याऐवजी अधिक आक्रमक होण्याची लक्षणे असल्यामुळे जागतिक खनिज तेल बाजारात खनिज तेलाचे दर मोठ्या प्रमाणात वाढले. त्याचबरोबर सध्याच्या परिस्थितीत डॉलर बळकट होऊन रुपया कमकुवत होत असल्यामुळे परदेशी संस्थागत गुंतवणूकदारांनी भारतीय शेअर बाजारात विक्री वाढविली आहे. त्याचाही परिणाम शेअर बाजारावर झाला. या गुंतवणूकदारांनी शुक्रवारी 6.036 कोटी रुपयांच्या शेअरची विक्री केली. देशातील संस्थागत गुंतवणूकदार निर्देशांकांना आधार देण्याचा प्रयत्न करीत असून या गुंतवणूकदारांनी 6,971 कोटी रुपयांच्या शेअरची शुक्रवारी खरेदी केली. सोमवारची आकडेवारी उशिरा उपलब्ध होणार आहे. गेल्या आठवड्यात शेअर बाजाराचे निर्देशांक 4 टक्क्यांनी कोसळले होते. यामध्ये खंड पडला नाही. त्यामुळे गुंतवणूकदार बरेच निराश झाले असल्याचे वातावरण आहे. मोतीलाल ओसवाल फायनान्शियल सर्व्हसेस कंपनीचे संशोधन प्रमुख सिद्धार्थ खेमका यांनी सांगितले की, खनिज तेलाच्या किमती वाढल्या आहेत. त्यामुळे खनिज तेलाशी संबंधित कंपन्यावर थेट परिणाम झाला आहे. त्यामध्ये तेल कंपन्या, विमान वाहतूक कंपन्या, पेंट, सिमेंट कंपन्या इत्यादीचा समावेश आहे. बँकिंग शेअर वरही आज नकारात्मक परिणाम झाला असल्याचे दिसून आले. कारण भांडवल सुलभतेचा प्रश्न निर्माण होऊ शकतो असे गुंतवणूकदारांना वाटत आहे. क्षेत्र घट – स्मॉल कॅप 2.11% मिडकॅप 2.08% बँकिंग 4.50% वाहन 3.89% सेवा 3.37% नैसर्गिक वायू 3.11% खासगी बँका 2.490%. रुपयाचे मूल्य कोसळले 53 पैशांनी शिया, चीन आणि इराणने अमेरिकेविरोधात अधिक आक्रमक भूमिका स्वीकारल्यानंतर आखातातून खनिज तेलाच्या वाहतुकीवर जास्त परिणाम होण्याच्या शक्यतेमुळे खनिज तेलाचे दर सोमवारी 15.18 टक्क्यांनी वाढून 106.8 डॉलर प्रति पिंप या पातळीवर गेले. त्यामुळे आपल्या गरजेच्या 85% खनिज तेल आयात करणार्या भारतावर याचा जास्त परिणाम होणार आहे. भारताला यासाठी परकीय चलन मोजावे लागत असल्यामुळे रुपयाचा भाव सोमवारी 53 पैशांनी कोसळून 92.35 रुपये प्रति डॉलर झशला. कोसळला. रुपया घसरून डॉलर वधारत असल्यामुळे डॉलर केंद्री वित्तीय उत्पादनात भारतातील गुंतवणूक जात आहे. अशा परिस्थितीत परदेशी संस्थागत गुंतवणूकदारांनी भारतीय शेअर बाजारात विक्री वाढविली आहे. त्याचबरोबर आगामी काळात डॉलर आणखी वधारण्याची शक्यता असल्यामुळे डॉलरची मागणी वाढून रुपयाचे मूल्य कोसळत असल्याचे विश्लेषकांनी सांगितले. एकीकडे रुपया कोसळत असताना डॉलर चलनाच्या तुलनेत जास्तच बळकट होत आहे. जागतिक पातळीवर डॉलरची मागणी वाढल्यामुळे सहा चलनाच्या तुलनेत डॉलरचे मूल्य दर्शविणारा डॉलर इंडेक्स सोमवारी 0.35 टक्क्यांनी वाढून 99.33 या अंकावर आला आहे. हा निर्देशांक काही आठवड्यापूर्वी 96 अंकावर होता. याचा परिणाम भारतीय रुपयाबरोबरच वेगाने विकसित होणार्या इतर देशांच्या चलनावरही होत आहे. चलन बाजारातील व्यापार्यांनी सांगितले की एकूण जागतिक परिस्थिती रुपयासाठी बरीच नकारात्मक झाली आहे. अशा परिस्थितीत रुपयाचे मूल्य नकारात्मक पातळीवरच राहण्याची शक्यता आहे. रिझर्व बँक रुपयाचे मूल्य स्थिर करण्यासाठी काही प्रमाणात हस्तक्षेप करू शकते. कारण रिझर्व बँकेकडे असलेले परकीय चलन सध्या 725 अब्ज डॉलर या विक्रमी पातळीवर आहे. परिस्थिती इतकी अस्थिर आहे की रुपयाचे मूल्य कोणत्या पातळीवर स्थिर ठेवावे यासंदर्भात मतभेद निर्माण होऊ शकतात. मात्र या घडामोडीचा निर्यातदारांना लाभ होण्याची शक्यता आहे. परंतु जागतिक व्यापार युद्धामुळे आणि इतर कारणामुळे जागतिक आयात- निर्यातीवरच नकारात्मक परिणाम झालेला आहे. औषधी, माहिती तंत्रज्ञान कंपन्यांच्या शेअरची खरेदी – शेअर बाजाराचे मुख्य निर्देशांक बर्याच प्रमाणात कोसळले आहेत. रुपयाचा दरही बराच कमी झाला आहे. या घटनाक्रमाचा माहिती तंत्रज्ञान आणि औषधी क्षेत्राला फायदा होण्याची शक्यता असल्यामुळे इतर क्षेत्राचे निर्देशांक कोसळले असले तरी माहिती तंत्रज्ञान आणि औषधी कंपन्यांच्या शेअरची बरीच खरेदी झाली असल्याचे दिसून आले. या संदर्भात जिओजेत इन्व्हेस्टमेंट या कंपनीचे संशोधन प्रमुख विनोद नायर यांनी सांगितले की, काही गुंतवणूकदार दीर्घ पल्ल्याचा विचार करून सध्याच्या परिस्थितीतही खरेदी करीत आहेत हे गुंतवणूकदार काही निवडक ब्लुचिप कंपन्यांच्या शेअरची खरेदी करीत आहेत. त्यामध्ये ग्राहक वस्तू आणि इतर क्षेत्रातील निवडक कंपन्यांचा समावेश आहे. रुपयाचा दर कोसळल्यामुळे निर्यात करणार्या क्षेत्राला आगामी काळात अधिक लाभ होऊ शकतो असे गुंतवणूकदारांना वाटते. औषधी क्षेत्रातून बरीच निर्यात होते. रुपया कोसळल्यामुळे या क्षेत्राला निर्यातीतून होणारा लाभ जास्त होणार आहे. त्यामुळे या क्षेत्रातील कंपन्यांच्या शेअरची खरेदी केली जात असल्याचे दिसून येते.
