Corporate Q3 Results: चालू आर्थिक वर्षाच्या तिसऱ्या तिमाहीचे (Q3) निकाल जाहीर होत आहेत. कॉर्पोरेट जगतात संमिश्र वातावरण पाहायला मिळत आहे. देशातील आघाडीची विमान कंपनी इंडिगोला परिचालन आव्हानांमुळे मोठा फटका बसला असून नफ्यात ७८ टक्क्यांची घसरण झाली आहे. दुसरीकडे, बँक ऑफ इंडियाने स्थिर कामगिरी केली आहे, तर उज्जीवन बँक आणि IIFL फायनान्सच्या नफ्यात लक्षणीय वाढ नोंदवण्यात आली आहे. IndiGo: तांत्रिक अडचणी आणि नव्या नियमांचा फटका इंडिगो एअरलाइन्सचा शुद्ध नफा गेल्या वर्षीच्या २,४४८.८ कोटी रुपयांवरून घसरून ५४९.१ कोटी रुपयांवर आला आहे. उड्डाणांमधील व्यत्यय आणि नवीन कामगार कायद्यांच्या (Labour Code) अंमलबजावणीमुळे कंपनीवर अनुक्रमे ५७७ कोटी आणि ९६९ कोटी रुपयांचा अतिरिक्त बोजा पडला आहे. मात्र, कंपनीचे एकूण उत्पन्न वाढून २४,५४०.६ कोटी रुपयांवर पोहोचले आहे. Bank of India: बँक ऑफ इंडियाचा नफा ७ टक्क्यांनी वाढला सार्वजनिक क्षेत्रातील बँक ऑफ इंडियाने २,७०५ कोटी रुपयांचा शुद्ध नफा कमावला आहे. बँकेच्या ‘नॉन-कोर’ उत्पन्नातील वाढ आणि कर्ज वितरणातील १४ टक्क्यांच्या विकासामुळे ही वाढ शक्य झाली आहे. निकालानंतर बँकेच्या शेअर्समध्ये ५ टक्क्यांहून अधिक तेजी दिसून आली. Adani Energy Solutions: टॅक्समुळे नफा घसरला अदानी एनर्जी सोल्युशन्सच्या नफ्यात ८ टक्क्यांची घट झाली असून तो ५७४.०६ कोटी रुपये इतका नोंदवण्यात आला आहे. गेल्या वर्षी कंपनीला टॅक्स क्रेडिट मिळाले होते, मात्र यंदा २२६ कोटी रुपयांचा टॅक्स भरावा लागल्याने नफ्यावर परिणाम झाला आहे. असे असले तरी, ट्रान्समिशन व्यवसायातील महसूल वाढल्याने एकूण उत्पन्न ६,९४४ कोटी रुपये झाले आहे. Bandhan Bank: उत्पन्नात घट, नफा ५१ टक्क्यांनी खाली बंधन बँकेसाठी ही तिमाही आव्हानात्मक ठरली आहे. बँकेचा नफा ५१.७ टक्क्यांनी घसरून २०५.५९ कोटी रुपयांवर आला आहे. वाढता खर्च आणि कमी उत्पन्न ही यामागची मुख्य कारणे आहेत. मात्र, बँकेचा एनपीए (NPA) ३.३३ टक्क्यांपर्यंत खाली येणे ही सकारात्मक बाब ठरली आहे. Ujjivan Small Finance Bank: ७१ टक्क्यांची ऐतिहासिक वाढ उज्जीवन बँकेने जोरदार कामगिरी करत १८६ कोटी रुपयांचा नफा मिळवला आहे. बँकेचे निव्वळ व्याज उत्पन्न (NII) पहिल्यांदाच १,००० कोटी रुपयांच्या पार गेले आहे. सुरक्षित आणि असुरक्षित अशा दोन्ही कर्ज प्रकारांमध्ये बँकेने २१.६ टक्क्यांची वाढ नोंदवली आहे. IIFL Finance: नफ्यात मोठी वाढ, पण शेअर्समध्ये घसरण IIFL फायनान्सचा नफा ८२ कोटींवरून थेट ५०१ कोटी रुपयांवर पोहोचला आहे. गोल्ड लोन व्यवसायात मोठी वाढ झाल्याने हे यश मिळाले आहे. मात्र, प्राप्तिकर विभागाने ‘स्पेशल ऑडिटर’ नियुक्त केल्याच्या वृत्तामुळे कंपनीचा शेअर १३ टक्क्यांनी कोसळला. कंपनीने हे केवळ प्रशासकीय पाऊल असल्याचे स्पष्ट केले आहे. हेही वाचा – Donald Trump: ‘आता हे युद्ध थांबायलाच हवे’; दावोसमध्ये ट्रम्प-झेलेन्स्कींची भेट, लवकरच पुतिन यांच्याशीही चर्चा करणार
