नवी दिल्ली : जर तुम्ही रेशन कार्डाद्वारे मिळणाऱ्या मोफत धान्याचा लाभ घेत असाल, तर ही बातमी तुमच्यासाठी अत्यंत महत्त्वाची आहे. ३१ डिसेंबर २०२५ पूर्वी रेशन कार्डाची e-KYC प्रक्रिया पूर्ण करणे अनिवार्य करण्यात आले आहे. ही मुदत पाळली नाही, तर १ जानेवारी २०२६ पासून तुम्हाला मिळणारे मोफत रेशन बंद होऊ शकते. अनेक लाभार्थ्यांना अद्याप त्यांचे e-KYC झाले आहे की नाही, याची कल्पना नाही. त्यामुळे वेळेत स्टेटस तपासून ही प्रक्रिया पूर्ण करण्याचे आवाहन करण्यात आले आहे. e-KYC न केल्यास काय होईल? रेशन कार्डाची ई-केवायसी पूर्ण नसल्यास, नवीन वर्षात केवळ मोफत धान्यच नाही, तर रेशन कार्डशी संबंधित इतर सरकारी योजनांचा लाभही घेता येणार नाही. शासनाने पारदर्शकता आणण्यासाठी आणि अपात्र लाभार्थ्यांना वगळण्यासाठी ही मोहीम हाती घेतली आहे. असे तपासा e-KYC स्टेटस (Status Check) तुमची ई-केवायसी प्रक्रिया पूर्ण झाली आहे की नाही, हे तुम्ही घरबसल्या खालील पद्धतीने तपासू शकता: १. सर्वप्रथम मोबाईलमध्ये ‘Mera Ration’ (मेरा राशन) हे ॲप डाऊनलोड करा. २. ॲपमध्ये आधार कार्ड किंवा रेशन कार्ड नंबर टाकून लॉगिन करा. ३. आधारशी लिंक असलेल्या मोबाईलवर आलेला ओटीपी (OTP) टाकून व्हेरिफिकेशन करा. ४. त्यानंतर आपली लोकेशन (राज्य/जिल्हा) निवडा. ५. आता स्क्रीनवर ‘Manage Family Detail’ किंवा ‘Know Your Entitlement’ या पर्यायावर क्लिक करा. ६. जर तुमच्या नावापुढे ‘Y’ असे लिहिले असेल, तर केवायसी पूर्ण झाली आहे आणि ‘N’ लिहिले असेल, तर केवायसी अपूर्ण आहे असे समजावे. घरबसल्या e-KYC करण्याची पद्धत – जर तुमची केवायसी झालेली नसेल, तर तुम्ही मोबाईलद्वारे ती पूर्ण करू शकता: १. ‘Mera e-KYC’ आणि ‘Aadhaar FaceRD’ ही दोन ॲप्स डाऊनलोड करा. २. तुमचे राज्य आणि ठिकाणाची माहिती भरा. ३. कुटुंबातील मुख्य व्यक्तीचा आधार क्रमांक किंवा रेशन कार्ड नंबर टाका. ४. कॅप्चा कोड भरून ‘Generate OTP’ वर क्लिक करा. ५. प्राप्त झालेला ओटीपी प्रविष्ट करा. ६. आता ‘Face e-KYC’ साठी कॅमेरा सुरू होईल. कुटुंबातील सर्व सदस्यांचे फेस ऑथेंटिकेशन (चेहरा स्कॅन) करणे अनिवार्य आहे. ७. फोटो सबमिट झाल्यानंतर तुमची ई-केवायसी प्रक्रिया पूर्ण होईल. तांत्रिक अडचणी टाळण्यासाठी शेवटच्या तारखेची वाट न पाहता लवकरात लवकर ही प्रक्रिया पूर्ण करून घ्यावी, जेणेकरून नवीन वर्षात रेशन मिळण्यास कोणतीही अडचण येणार नाही.
