Car Loan: नवीन वर्षात स्वतःची कार खरेदी करण्याचा विचार करणाऱ्या सर्वसामान्यांसाठी दिलासादायक बातमी आहे. २०२६ च्या सुरुवातीलाच बँकिंग क्षेत्रात कार लोनसाठी मोठी स्पर्धा पाहायला मिळत असून, काही नामांकित सरकारी बँका अवघ्या ७.४० टक्के इतक्या अत्यल्प व्याजदराने कर्ज उपलब्ध करून देत आहेत. खाजगी बँकांच्या तुलनेत सरकारी बँकांनी ग्राहकांना स्वस्त कर्जाचा पर्याय दिल्याने ग्राहकांची मोठी बचत होणार आहे. सध्याच्या स्पर्धात्मक बाजारपेठेत युनियन बँक ऑफ इंडिया ही सर्वात कमी म्हणजे ७.४० टक्के दराने कार लोन ऑफर करत आहे. त्यापाठोपाठ पंजाब नॅशनल बँक, यूको बँक, इंडियन बँक आणि बँक ऑफ महाराष्ट्र यांसारख्या बँकांनी देखील आपले सुरुवातीचे व्याजदर ७.५० टक्क्यांच्या आसपास ठेवले आहेत. सेंट्रल बँक ऑफ इंडियाने तर ग्राहकांसाठी ३१ मार्च २०२६ पर्यंत प्रोसेसिंग फी पूर्णपणे माफ करण्याची घोषणा केली असून त्यांचे दर ७.६० ते ९.२० टक्क्यांच्या दरम्यान आहेत. विशेष म्हणजे बँक ऑफ महाराष्ट्र आपल्या जुन्या होम लोन ग्राहकांसाठी आणि सहा महिन्यांहून अधिक काळ खाते असलेल्या ग्राहकांसाठी व्याजदरात ०.२५ टक्क्यांची अतिरिक्त सवलत देखील देत आहे. कर्जाच्या आर्थिक गणिताचा विचार केला तर १० लाख रुपयांच्या कर्जावर ७.४० टक्के व्याजदराने ५ वर्षांच्या कालावधीसाठी मासिक हप्ता म्हणजेच ईएमआय १९,९९०.४६ रुपये इतका येतो. या पाच वर्षांच्या संपूर्ण कालावधीत ग्राहकाला व्याजापोटी एकूण १,९९,४२७.७७ रुपये मोजावे लागतील. म्हणजेच १० लाखांच्या कर्जावर पाच वर्षांनंतर एकूण ११,९९,४२७.७७ रुपयांची परतफेड करावी लागेल. हे दर ग्राहकाची पात्रता, त्याचे उत्पन्न आणि सिबिल स्कोअरवर अवलंबून असतील. ज्या ग्राहकांचा क्रेडिट स्कोअर उत्तम आहे, त्यांना या सर्वात कमी दराचा लाभ घेता येणार आहे. दुसरीकडे खाजगी क्षेत्रातील बँकांचे कर्ज सरकारी बँकांच्या तुलनेत थोडे महाग असल्याचे दिसून येत आहे. एचडीएफसी बँकेचे कार लोन दर ८.२० टक्क्यांपासून सुरू होतात, तर आयसीआयसीआय बँकेचे दर ८.५० टक्क्यांपासून पुढे आहेत. आयडीएफसी फर्स्ट बँक आणि फेडरल बँक यांसारख्या बँकांचे दर यापेक्षाही जास्त आहेत. त्यामुळे नवीन कार घेण्यापूर्वी ग्राहकांनी केवळ शोरूममधील फायनान्स स्कीमवर अवलंबून न राहता विविध बँकांच्या व्याजदरांची तुलना करणे अत्यंत फायदेशीर ठरेल. थोड्या पूर्वतयारीमुळे ग्राहकांना व्याजाच्या पैशात मोठी बचत करण्याची संधी उपलब्ध झाली आहे.
