Vasant More : पुणे महानगरपालिकेत प्रमुख पदांवर काम करणाऱ्या सर्व पक्षीय नगरसेवकांना निवडणुकीत पाडण्यात आले, हे सत्ताधाऱ्यांचे षडयंत्र असल्याचा गंभीर आरोप ठाकरे गटाचे नेते वसंत मोरे (Vasant More) यांनी केला आहे. यामुळे पुण्याच्या स्थानिक राजकारणात खळबळ उडाली आहे. राज्यातील २९ महापालिकांच्या निवडणुकीचा निकाल जाहीर झाला. या निकालात अनेक दिग्गज उमेदवारांच्या वाट्याला पराभव आला. भाजपला अभूतपूर्व यश महापालिका निवडणुकीत मिळाले. पुणे महापालिकेत भाजपचे तब्बल ११९ नगरसेवक विजयी झाले. त्यामुळे सत्तेच्या चाव्या भाजपच्या हाती जाणार असल्याचे स्पष्ट झाले आहे. Vasant More Image ठाकरे गटाचे नेते वसंत मोरे (Vasant More )यांनी प्रभाग क्रमांक ३८ मधून निवडणूक लढवली होती. मात्र, त्यांचा भाजपच्या उमेदवाराने पराभव केला. ११०० मतांनी मोरे पराभूत झाले. यानंतर त्यांनी त्यांच्या सोशल मीडिया अकाऊंटवर एक पोस्ट लिहित व्हिडीओ शेअर केला होता. आता यानंतर वसंत मोरे यांनी दुसरी पोस्ट लिहिली आहे. वसंत मोरे यांनी एक लांबलचक पोस्ट लिहीत पराभत उमेदवारांची यादीच दिली आहे. हे सर्वजण जर सभागृहात असते तर राज्य सरकारत्या चार वर्षांच्या पापाचा पाढा सतत बाहेर काढला असता, असे म्हणत त्यांनी सत्ताधाऱ्यांवर जोरदार टीकास्त्र डागले आहे. नेमकं वसंत मोरे पोस्टमध्ये काय म्हणाले? पुणेकरांनी थोडा विचार करावा हे का घडवण्यात आले ? याला कारण 2022 ते 2026 या कालावधीमधे राज्य सरकारने प्रशासनाला हाताशी धरून पुणे महानगरपालिकेत केलेला कारभार वेळोवेळी बाहेर काढला जाईल…या भीतीने पुणे महानगरपालिकेत प्रमुख पदांवर काम करणाऱ्या सर्व पक्षीय नगरसेवकांना निवडणुकीत पाडण्यात आले…, हे षडयंत्र सत्ताधाऱ्यांनी केलं… आबा बागुल माजी विरोधी पक्षनेता, दत्तात्रय धनकवडे माजी महापौर, सुभाष जगताप माजी सभागृहनेता, विशाल तांबे माजी स्थायी समिती चेअरमन, अश्विनी कदम माजी स्थायी समिती चेअरमन, वसंत मोरे माजी विरोधी पक्षनेता गटनेता, संजय भोसले माजी गटनेता, दिपाली धुमाळ माजी विरोधी पक्षनेता, साईनाथ बाबर माजी गटनेता, अशोक हरणावळ माजी गटनेता, शंकर केमसे माजी सभागृहनेता, किशोर शिंदे माजी गटनेता, बाबू वागसकर माजी गटनेता, अविनाश बागवे स्थायी समिती सभासद, नंदाताई लोणकर स्थायी समिती सभासद, योगेश ससाने स्थायी समिती सभासद, नाना भानगिरे स्थायी समिती सभासद, रूपाली पाटील शहर सुधारणा अध्यक्ष हे सर्वजण जर सभागृहात असते तर यांच्या चार वर्षाच्या पापाचा पाढा सतत बाहेर काढला असता… हेही वाचा : “आजा, तुझा आशीर्वाद…”; बाळासाहेब ठाकरेंच्या जन्मशताब्दी वर्षानिमित्त आदित्य ठाकरेंची भावनिक पोस्ट
