प्रभात वृत्तसेवा पुणे – सावित्रीबाई फुले पुणे विद्यापीठाने आर्थिक दुर्बल, गुणवत्ताधारक व मागासवर्गीय विद्यार्थ्यांसाठी दिलासा देणारा निर्णय घेत विविध अर्थसहाय्य योजनांसाठी ऑनलाइन अर्ज प्रक्रिया सुरू केली आहे. पदवी व पदव्युत्तर अभ्यासक्रमात शिक्षण घेणाऱ्या पात्र विद्यार्थ्यांना या योजनांचा लाभ घेता येणार असून, अर्ज करण्याची अंतिम मुदत १० जानेवारी आहे. पुणे विद्यापीठातील शैक्षणिक विभाग, संलग्न अस्वायत्त महाविद्यालयातील पदवी, पदव्युत्तर अभ्यासक्रमास प्रवेश घेतलेल्या विद्यार्थ्यांसाठी विविध अर्थसहाय्य योजना राबवण्यात येतात. या योजनांसाठी ऑनलाइन अर्ज १० जानेवारी, तर छाननी केलेले अर्ज विद्यापीठाकडे सादर करण्यासाठी महाविद्यालय, विभागांना १५ जानेवारीपर्यंतची मुदत देण्यात आली आहे. विद्यापीठाचे उपकुलसचिव डॉ. मुंजाजी रासवे यांनी याबाबतचे परिपत्रक प्रसिद्ध केले आहे. या योजनांतर्गत पदवी व पदव्युत्तर स्तरावरील हजारो विद्यार्थ्यांना गुणवत्तेनुसार २ हजार ते १६ हजार रुपयांपर्यंत अर्थसहाय्य दिले जाणार आहे, तसेच छत्रपती शिवाजी महाराज अर्थसहाय्य योजनेअंतर्गत सर्व विद्याशाखांमधून सर्वाधिक गुण मिळवणाऱ्या एका विद्यार्थ्याला ५ हजार रुपये दिले जाणार आहेत. विद्यापीठातर्फे राबविण्यात येणाऱ्या योजना – क्रांतिज्योती सावित्रीबाई फुले अर्थसहाय्य योजना – लोकशाहीर अण्णा भाऊ साठे अर्थसहाय्य योजना – राजर्षि छत्रपती शाहू महाराज अर्थसहाय्य योजना – महात्मा ज्योतीराव फुले अर्थसहाय्य योजना – स्वामी विवेकानंद अर्थसहाय्य योजना (पूर, दुष्काळ, आपत्तीग्रस्त भागातील विद्यार्थ्यांसाठी) – छत्रपती शिवाजी महाराज अर्थसहाय्य योजना
