प्रभात वृत्तसेवा पुणे – शहरासह जिल्ह्यात सलग तिसऱ्या दिवशी किमान तापमानात घट झाल्यामुळे हुडीहुडी भरणाऱ्या थंडीला पुन्हा सुरवात झाली आहे. हवेली परिसरात किमान तापमान १२ अंशापर्यंत खाली आले असून, पुढील दोन ते तीन दिवस शहरात किमान तापमानात काही अंशी घट होण्याची शक्यता असल्याने थंडीचा जोर वाढेल, असा अंदाज आहे.हवामानातील बदलामुले मागील आठवड्यात कमाल व किमान तापमानात लक्षणीय वाढ झाली. परिणामी ६ अंशापर्यंत खाली आलेला थंडीचा पारा १८ अंशावर गेल्यामुळे थंडी गायब झाली होती. गेल्या ४८ तासात किमान तापमानात चार ते पाच अंशाने घट झाली आहे. विशेषत: शहर परिसरातील हवेली, पाषाण, कात्रज, धायरी, औंध परिसरात किमान तापमानात घट झाल्याने थंडीचा जोर वाढू लागला आहे. हवेली, माळीण पाठोपाठ पाषाण येथे १३.७, शिवाजीनगर परिसरात १४.४ अंश सेल्सिअस किमान तापमानाची नोंद झाली. दरम्यान, दित्वाह चक्रीवादळामुळे दक्षिण महाराष्ट्र आणि विदर्भात पावसाची शक्यता असल्यामुळे पुणे जिल्ह्यात रात्रीच्या तापमानात वाढ होण्याची शक्यता आहे. तसेच दिवसभर ऊन आणि ढगाळ वातावरण राहील, असा अंदाज वेधशाळेने वर्तविला आहे.
