पुणे : ‘2 बीएचके डिनर अँड की क्लब’ या प्रसिद्ध हॉटेल व क्लबचा दारू विक्री परवाना निलंबित करण्याच्या राज्य उत्पादन शुल्क विभागाच्या आदेशाला उच्च न्यायालयाने मोठा दिलासा दिला आहे. डॉ. हेरंब शेलके यांनी दाखल केलेल्या रिट याचिकेवर सुनावणी करताना न्यायालयाने परवाना निलंबनाच्या आदेशाला स्थगिती देत, संबंधित आस्थापना तात्काळ डी-सील करून पुन्हा सुरू करण्याचे आदेश दिले आहेत. या प्रकरणात डॉ. हेरंब शेलके यांच्या वतीने ज्येष्ठ वकील प्रल्हाद परांजपे यांनी बाजू मांडली. त्यांनी उत्पादन शुल्क विभागाची कारवाई ही मनमानी व अधिकाराचा गैरवापर करणारी असल्याचा युक्तिवाद केला. न्यायालयाने यावर दखल घेत, १५ दिवसांच्या बंदीचा आदेश स्थगित केला. या निर्णयानंतर ‘2 बीएचके डिनर अँड की क्लब’ तात्काळ सुरू होणार असून, हा निकाल कायदा व सुव्यवस्था अबाधित असल्याचे अधोरेखित करणारा असल्याचे डॉ. हेरंब शेलके यांनी सांगितले. “कायद्यापुढे कोणीही मोठे नाही आणि शेवटी सत्याचाच विजय होतो,” असे मत त्यांनी व्यक्त केले. उच्च न्यायालयाच्या या निकालामुळे राज्य उत्पादन शुल्क विभागाच्या जबाबदाऱ्या व उत्तरदायित्वाबाबत एक महत्त्वाचा न्यायनिवाडा झाला असून, भविष्यातील नियामक कारवाईसाठीही हा निर्णय मार्गदर्शक ठरणार आहे. दरम्यान, ‘2 बीएचके डिनर अँड की क्लब’ चे ब्रँड ओनर डॉ. हेरंब शेलके यांनी या कठीण काळात ग्राहकांकडून मिळालेल्या पाठिंबा व न्यायव्यवस्थेवर व्यक्त केलेल्या विश्वासाबद्दल आभार मानले आहेत. आगामी काळातही स्थानिक खाद्यसंस्कृतीत योगदान देत, दर्जेदार सेवा सुरू ठेवण्याचा निर्धार त्यांनी व्यक्त केला आहे.
