प्रभात वृत्तसेवा पुणे – नवीन वर्षाच्या पूर्वसंध्येला (दि. ३१ डिसेंबर) शहरासह उपनगरांतील हाॅटेल, फार्महाउस यांसह अन्य ठिकाणी पार्टीचे नियोजन केले जाते. त्यामुळे मद्यपान करून वाहने चालविणाऱ्यांची संख्या अधिक असते. या वेळी अपघाताची शक्यता अधिक असल्याने या मद्यपींवर अंकुश ठेवण्यासाठी आणि अपघात टाळण्यासाठी पुणे प्रादेशिक परिवहन विभागाने (आरटीओ) मद्यपान करून वाहन चालवणाऱ्या वाहनचालकांवर कारवाईला सुरुवात केली आहे. येत्या ३१ डिसेंबरपर्यंत ही कारवाई सुरू राहणार असून, त्यासाठी आठ सुरक्षा पथके तैनात केली आहेत.नाताळ आणि त्यानंतर नवीन वर्षाचे स्वागत या पार्श्वभूमीवर नागरिक मद्यपान करून पार्टी करतात. मात्र, मद्यपान करून वाहन चालवल्यामुळे अपघाताची शक्यता असते. त्यामध्ये दुखापत, तर काहींना जीवही गमवावा लागल्याच्या घटना याआधी घडल्या आहेत. त्यामुळे राज्य परिवहन आयुक्त कार्यालयाने सर्व प्रादेशिक परिवहन विभागांना थर्टीफर्स्टच्या पार्श्वभूमीवर मद्यपान करून वाहन चालवणाऱ्यांच्या तपासणीचे आदेश दिले आहेत. त्यानुसार पुणे आरटीओने पोलिसांच्या मदतीने वेगवेगळ्या भागात वाहनांची तपासणी सुरू केली आहे.ब्रेथ ॲनालायझरच्या मदतीने वाहनचालकांची तपासणी केली जात आहे. मद्यपान करून वाहन चालवताना आढळल्यास कारवाई केली जात आहे. पुणे आरटीओकडून त्यासाठी आठ रस्तासुरक्षा पथके तयार केली आहे. ही पथके स्थानिक पोलीस ठाण्याच्या संपर्कात राहून कारवाईचे निर्देश आरटीओकडून देण्यात आले आहेत. रात्री साडेअकरानंतर शहरातील विविध प्रमुख रस्त्यांवर या करवाईला सुरवात होणार असल्याची माहिती आरटीओ प्रशासनाने दिली आहे.
