राजगड : भोर- राजगड- मुळशी विधानसभा मतदारसंघातील दुर्गम राजगड तालुक्यात विकासकामांसाठी भरीव निधी देणार आहे. तालुक्यातील प्रलंबित प्रश्न मार्गी लावणार आहे, अशी ग्वाही आमदार शंकर मांडेकर यांनी दिली. विंझर जिल्हा परिषद गटाचे राष्ट्रवादी काँग्रेसचे उमेदवार अमोल नलावडे आणि विंझर पंचायत समिती गणाचे उमेदवार अंकुश दसवडकर यांच्या प्रचारार्थ येथील श्री भैरवनाथ मंदिर परिसरात राष्ट्रवादी काँग्रेसचे आमदार शंकर मांडेकर यांच्या प्रमुख उपस्थितीत प्रचार सभा पार पडली. त्यावेळी मांडेकर बोलत होते. सभेला सुरुवात करण्यापुर्वी दिवंगत अजितदादांच्या फोटोला पुष्प वाहुन श्रद्धांजली अर्पण करण्यात आली. यावेळी सभेला संबोधित करताना आमदार मांडेकर यांनी तालुक्यात राबवलेल्या विविध विकासकामांचा आढावा जनतेसमोर मांडला. भोर-मुळशी-राजगड तालुक्यातील विकास कामे करताना दुजाभाव करणार नसल्याचे त्यांनी सांगितले. राष्ट्रवादी काँग्रेसचे तालुकाध्यक्ष किरण राऊत आणि ज्येष्ठ नेते संतोषअप्पा दसवडकर यांनीही यावेळी उपस्थितांना मार्गदर्शन केले. जनतेचा विश्वास आणि कार्यकर्त्यांची जिद्द पाहता, जिल्हा परिषद व पंचायत समितीच्या निवडणुकीत राष्ट्रवादी काँग्रेसचा विजय निश्चित आहे, असा ठाम विश्वास यावेळी उपस्थित नेत्यांनी व्यक्त केला. स्थानिक युवकांसाठी रोजगार आणि विकास या मुद्यांवर या सभेमध्ये नेते बोलले. विंझर पंचक्रोशीतील ग्रामस्थांनी दोन्ही उमेदवारांचे स्वागत केले.यावेळी विंझरचा विकास हाच ध्यास अशा घोषणा कार्यकर्ते देत होते. या सभेला आमदार शंकर मांडेकर, उमेदवार अमोल नलावडे, अंकुश दसवडकर, तालुकाध्यक्ष किरण राऊत,संतोष दसवडकर यांच्यासह राष्ट्रवादी काँग्रेसचे पदाधिकारी, कार्यकर्ते आणि ग्रामस्थ होते. दरम्यान, पुणे जिल्हा परिषद आणि पंचायत समिती निवडणुकीच्या रणधुमाळीत राजगड तालुक्यातील राजकीय वातावरण चांगलेच तापले आहे. तालुक्याचा 66 सर्वांगीण विकास हेच आमचे एकमेव ध्येय आहे. अजितदादांच्या विकासकामांचा वारसा पुढे न्यायचा आहे. यासाठी प्रत्येकाने प्रयत्न करावे. गावागावात परिवर्तन घडवण्यासाठी अमोल नलावडे आणि अंकुश दसवडकर यांच्यासारखे तरुण व अभ्यासू नेतृत्व जिल्हा परिषद व पंचायत समितीमध्ये गेल्यास विकासाची गंगा घराघरांत पोहोचेल. शंकर मांडेकर, आमदार, भोर-राजगड-मुळशी
