प्रभात वृत्तसेवा पुणे – बुधवारी पुणे वायुसेना स्थानकावर १० वा माजी सैनिक दिन साजरा करण्यात आला. या वेळी वायुसेना स्थानकावर लष्कर, नौदल आणि वायुसेनेचे ४००० हून अधिक माजी सैनिक आणि अधिकारी उपस्थित होते. भारतीय लष्कराचे पहिले भारतीय सेनाप्रमुख के. एम. करिअप्पा यांच्या निवृत्तीदिनी म्हणजेच १४ जानेवारीला २०१६ पासून माजी सैनिक दिन म्हणून साजरा केला जातो. या वेळी राज्याचे उच्च व तंत्रशिक्षणमंत्री चंद्रकांत पाटील प्रमुख पाहुणे म्हणून उपस्थित होते. सोबतच भारतीय लष्कराच्या दक्षिण कमांडचे प्रमुख धीरज सेठ, एनडीएचे कमांडंट वाइस ॲडमिरल अनिल जग्गी, वायुसेनेच्या नैऋत्य वायू कमांडचे प्रशासकीय प्रमुख गुर्जत सिंग भुल्लर, पुणे वायूसेना स्थानकाचे प्रमुख एअर कमांडंट सतबीर सिंग राय आदी उपस्थित होते. कार्यक्रमाची सुरुवात देशासाठी सर्वोच्च बलिदान देणाऱ्या शहिद सैनिकांच्या स्मृतीस अभिवादन करत झाली. या वेळी बोलताना पाटील यांनी माजी सैनिकांच्या समर्पण, शिस्त आणि त्यागाबद्दल त्यांचे आभार मानले आणि त्यांच्या कल्याणासाठी सतत सहकार्य करण्याचे आश्वासन दिले, तर राय आणि सेठ यांनी विविध संस्थांनी माजी सैनिकांसाठी हाती घेतलेल्या महत्त्वाच्या कल्याणकारी उपाययोजनांवर प्रकाश टाकला, तसेच भारतीय सैन्य आणि राष्ट्र उभारणीत त्यांच्या निःस्वार्थ सेवेबद्दल माजी सैनिकांचे आभार मानले. माजी सैनिकांना भेडसावणाऱ्या निवृत्ती वेतन, आर्थिक मदत, ईसीएसएस योजना आणि इतर कल्याणकारी योजनांचा लाभ घेताना त्यांना येणाऱ्या अडचणी सोडवण्याचे व्यासपीठ देखील या वेळी उपलब्ध करून दिले गेले. या वेळी विविध कल्याणकारी संस्था आणि योजनांची माहिती माजी सैनिकांना देण्यात आली.
