प्रभात वृत्तसेवा पुणे – एकल मातांच्या मुलांना शिक्षणासाठी सुविधा पुरविण्यात येणार असून, यासाठी शालेय शिक्षण विभागाकडून पहिल्यांदाच एकल मातांच्या मुलांचे सर्वेक्षण सुरू करण्यात आले आहे. त्यात एकल मातांच्या मुलांची जिल्हानिहाय माहिती व आकडेवारी संकलित करण्याचे कामही हाती घेण्यात आले आहे.एकल मातांची आर्थिक आणि सामाजिक स्थिती दयनीय आहे. एकल मातांच्या मुलामुलींचे शिक्षण करणे त्यांना खूप कठीण जाते. अनेकदा या महिला त्यांच्या मुलामुलींना शाळेतून काढतात. एकल मातांच्या मुलामुलींची संख्या संकलित करून त्यांच्या शिक्षणाकडे विशेष लक्ष देण्याची गरज निर्माण झालेली आहे. त्यामुळे एकल मातांच्या पहिली ते बारावीपर्यंतच्या मुलामुलींची संख्या संकलित करून शासनाला सादर करावी लागणार आहे. प्राथमिक शिक्षण संचालक शरद गोसावी यांनी विभागीय शिक्षण उपसंचालक, प्राथमिक आणि माध्यमिक शिक्षणाधिकारी, शिक्षण निरीक्षक, महापालिका, नगरपालिकांचे प्रशासन अधिकारी यांना सूचनाही दिल्या आहेत.एकल मातांच्या मुलामुलींच्या वेगवेगळ्या समस्या आहेत. एकल मातांना आर्थिक मदत नसते. ही बाब लक्षात घेऊन एकल मातांच्या मुलामुलींची संख्या संकलित करण्यात येत आहे. आतापर्यंत सुमारे १७ जिल्ह्यांकडून एकल मातांच्या मुलामुलींची संख्या सादर करण्यात आली आहे. राज्यभरातील सर्व जिल्ह्यांतील आकडेवारी प्राप्त झाल्यावर ती शासनाला सादर करण्यात येणार आहे. ही संख्या पाहून या विद्यार्थ्यांसाठी सुविधा देण्याच्या अनुषंगाने शासन स्तरावरून योग्य तो निर्णय घेण्यात येणार आहे. एकल मातांच्या मुलांची आकडेवारी शिक्षण विभागाकडे उपलब्ध नाही. एकल मातांना भेडसावणाऱ्या सामाजिक, आर्थिक प्रश्नांमुळे त्यांच्या मुलांच्या शिक्षणात समस्या निर्माण होतात. या मुलांसाठी काही सुविधा सवलती देण्याच्या अनुषंगाने या मुलांचे सर्वेक्षण करण्याची मागणी सामाजिक कार्यकर्त्यांनी शालेय शिक्षणमंत्री दादा भुसे यांच्याकडे केली होती. त्यानुसार त्यांनी सर्वेक्षणाचे आदेश दिले आहेत.
