Pune News – इंडियन स्टुडंट कौन्सिलच्या वतीने क्रांतिज्योती सावित्रीबाई फुले यांच्या जयंतीनिमित्त देण्यात येणारे ‘सावित्रीच्या लेकी’ आणि राज्यस्तरीय पुरस्कारांचे वितरण उत्साहात पार पडले. या वर्षीचा राष्ट्रीय ‘सावित्रीच्या लेकी’ पुरस्कार अभिनेत्री विभावरी देशपांडे (सांस्कृतिक), मुंबईच्या माजी महापौर किशोरी पेडणेकर (राजकीय) आणि मध्य प्रदेशातील प्रा. डॉ. सरिता मालवीय (संशोधन) यांना प्रदान करण्यात आला. तसेच, राजर्षी छ. शाहू महाराज राज्यस्तरीय पुरस्कार चिन्मयी सुमित, अनिल कलकुटकी आणि डॉ. जगन्नाथ गोपाळ यांना देण्यात आला. ज्येष्ठ अभिनेत्री सुषमा देशपांडे आणि कवी अरुण म्हात्रे यांच्या हस्ते हे पुरस्कार वितरित करण्यात आले.राज्यस्तरीय ‘सावित्रीच्या लेकी’ पुरस्काराने प्रा. डॉ. अरुणा वाघोले (संशोधन), प्राची घाणेकर (पत्रकारिता), अस्मिता चांदणे (साहित्य), पल्लवी पुजारी (शिक्षण), वैशाली सावळे आणि करुणा विमल (सामाजिक) यांना सन्मानित केले गेले. यासोबतच ‘साऊ-ज्योतिबा आदर्श लेखणी’ आणि ‘विशेष सावित्रीच्या लेकी’ पुरस्कारांचेही वितरण झाले.पुरस्काराला उत्तर देताना चिन्मयी सुमित यांनी हा पुरस्कार जबाबदारीची जाणीव करून देणारा असल्याचे सांगत मराठी शाळांसाठी काम करण्याचा निर्धार व्यक्त केला. विभावरी देशपांडे यांनी सावित्रीबाईंच्या नावे पुरस्कार मिळणे हे भाग्य असल्याचे मानले, तर किशोरी पेडणेकर यांनी स्त्रियांना राजकारणात मिळालेल्या संधींचे श्रेय सावित्रीबाईंना दिले. कार्यक्रमाच्या प्रमुख पाहुण्या सुषमा देशपांडे यांनी सावित्रीबाईंच्या विचारांचे नाट्य प्रयोग सादर करण्याच्या गरजेवर भर दिला. संस्थेचे अध्यक्ष डॉ. ज्ञानोबा कदम यांनी प्रास्ताविक केले, तर कवी अरुण म्हात्रे यांनी ‘उंच माझा झोका’ हे शीर्षक गीत गाऊन कार्यक्रमाची सांगता केली. हा सोहळा यशस्वी करण्यासाठी प्रा. माधुरी राऊत, डॉ. माधवी महाके आणि अन्य सदस्यांनी परिश्रम घेतले.
