प्रभाग वृत्तसेवा पुणे : महापालिका निवडणुकासाठी जाहीर केलेल्या प्रभाग निहाय मतदारयादीत अनेक ठिकाणी मतदारांची पळवा पळवी झाली आहे. त्यावरून निवडणूक आयोग, महापालिकेवर सत्ताधाऱ्यांना मदत केल्याचा आरोप झाल्यानंतर निवडणूक आयोगाने मतदार यादी तक्रारीवर सुमोटो ( स्वत: हून) कारवाई करावी असे स्पष्ट केले. तसेच मतदार यादीत दुरूस्ती करण्याचे अधिकार महापालिका आयुक्तांना असल्याचे थेट आदेशच काढले. त्यानुसार, आयुक्तांनी बैठक घेत सर्व क्षेत्रीय कार्यालयांनी अशा तक्रारींची दखल घेत याद्यांची तातडीने दुरूस्ती करण्याचे आदेश दिले. प्रत्यक्षात दुरूस्तीच्या तपासणीसाठी गेलेले कर्मचारी तक्रारदाराला यादीत इतर प्रभागातून आलेले मतदार आणि इतर प्रभागात गेलेले मतदारांची आधारकार्डे आणून द्या, तरच दुरूस्ती केली जाईल असे सांगत आहेत. अशा प्रकारे आपली जबाबदारी मतदारांवर ढकलण्याचा धक्कादायक प्रकार समोर आला आहे. त्यामुळे आयुक्तांच्या आदेशाला केराची टोपली दाखविली जात असून निवडणूक आयोगाचा आदेशही धुडकावला जात असल्याचे दिसते. प्रभाग ३५ मध्ये हा प्रकार उघडकीस आला आहे.प्रभाग ३५ सनसिटी माणिकबाग मधील सुमारे २ ते ३ हजार मतदान प्रभाग ३४ नऱ्हे- वडगाव- धायरी या प्रभागात दाखविण्य़ात आले आहे. प्रत्यक्षात या प्रभाग ३५ मधील जे मतदार इतर प्रभागात दर्शविण्यात आले आहेत, त्यांचे नाव, पत्ता, तसेच इतर कोणत्याही माहितीत बदल झालेला नाही. तसेच विधानसभा निवडणुकीतही त्यांनी या भागात मतदान केले होते. त्यामुळे, या प्रकाराची तक्रार करण्यासाठी माजी नगरसेविका मंजूषा नागपूरे यांनी तक्रार केली. त्यावेळी तक्रार घेवुन गेलेल्या कार्यकर्त्यांना कर्मचाऱ्यांकडून उडवाउडवीची उत्तरे देत सर्व मतदारांची आधारकार्ड घेवून येण्याच्या सूचना दिल्या. आधारकार्ड असेल तरच तक्रार घेतली जाईल असे सांगत माघारी पाठवून देण्यात आले. “याद्याचे विभाजन क्षेत्रीय कार्यालयाच्या कर्मचाऱ्यांनी केले आहे. त्यांची चूक असतानाही आम्ही तक्रार केली, तर आम्हालाच पुरावे मागण्यात येत आहे. निवडणूक आयोगाने स्पष्टपणे सूचना केल्यानंतरही चुकीच्या पध्दतीने निवडणूक कर्मचारी अडवणूक करत आहेत. ही बाब अतिशय गंभीर आहे.” – मंजूषा नागपुरे (माजी नगरसेविका) “तक्रार आल्यानंतर स्वत:हून त्यात तपासणी करून बदल करण्याच्या सूचना सर्व क्षेत्रीय कार्यालयांना दिल्या आहेत. अशा प्रकारे अडवणूक झालेली असल्यास तातडीनं चौकशी केली जाईल, तसेच कारवाई केली जाईल.” – प्रसाद काटकर ( निवडणूक विभाग प्रमुख)
