Pune Crime : पुणे शहरातील बुधवार पेठ परिसरात सुरू असलेल्या अनैतिक व्यवसायावर मोठी कारवाई फरासखाना अणि खडक पोलिस यांच्या संयुक्त पथकाने छापा टाकला. या कारवाईत एकूण २२ महिलांना ताब्यात घेण्यात आले असून त्यापैकी ११ महिला बांगलादेशी नागरिक असल्याचे निष्पन्न झाले आहे. पोलिसांना मिळालेल्या गोपनीय माहितीनुसार, हा छापा टाकण्यात आला. संबंधित ठिकाणी काही महिला देहविक्री व्यवसायात सक्रीय असल्याची खात्री झाल्यानंतर खडक व फरासखाना पोलीस ठाण्यांच्या विशेष पथकांनी संयुक्त कारवाई केली. कारवाईदरम्यान ताब्यात घेण्यात आलेल्या २२ महिलांपैकी ११ महिलांनी वैध ओळखपत्र सादर केले. त्यांच्या कागदपत्रांची पडताळणी करण्यात आली असून त्या भारतीय नागरिक असल्याचे स्पष्ट झाले. उर्वरित ११ महिलांपैकी ६ जणींनी चौकशीत आपण बांगलादेशी असल्याची कबुली दिली. तर उर्वरित ५ महिलांच्या कागदपत्रांची तपासणी केली असता त्या देखील बांगलादेशी नागरिक असल्याचे निष्पन्न झाले. या प्रकरणी संबंधितांवर परकीय नागरिक कायदा तसेच अनैतिक मानवी व्यापार प्रतिबंधक कायद्याअंतर्गत कारवाई करण्यात येणार आहे. तसेच संबंधित वेश्यालय सील करण्याबाबतचा प्रस्ताव वरिष्ठ अधिकाऱ्यांकडे पाठविण्यात येणार असल्याची माहिती पोलिसांनी दिली. हेही वाचा: Vikrant Messi post : “पहिल्या दिवसापासून..”; विक्रांत मेस्सीने पत्नीला अनोख्या पद्धतीने दिल्या लग्नाच्या वाढदिवसाच्या शुभेच्छा
