प्रभात वृत्तसेवा पुणे – राष्ट्रवादी काँग्रेसने काँग्रेसला आघाडीचा प्रस्ताव दिल्यानंतर आता शिवसेना उद्धव बाळासाहेब ठाकरे पक्षासोबत चर्चा करण्यासाठी प्रस्ताव सादर केला आहे. शहर पदाधिकाऱ्यांकडे हा प्रस्ताव दिला असून, ठाकरे पक्षाकडून उद्या (गुरुवारी) पक्षाच्या मुंबईतील पदाधिकाऱ्यांसोबत याबाबत चर्चा केली जाणार आहे. त्यामुळे आता दोन्ही राष्ट्रवादी, काँग्रेस आणि शिवसेना हे सर्व एकत्र लढण्याची चिन्हे आहेत. तर या बैठकीला काॅग्रेसच्या पदाधिकाऱ्यांनाही निमंत्रण देण्यात आले होते. त्यामुळे यावेळी आघाडीची एकत्रित बैठकही झाली. पुढील दोन दिवसांच्या आत या जागा वाटपाचा तिढा सोडविला जाणार आहे. या बैठकिला राष्ट्रवादी पवार गटाकडून काकडे यांच्यासह माजी खासदार ॲड. वंदना चव्हाण, आमदार बापुसाहेब पठारे, माजी आमदार जयदेव गायकवाड, विशाल तांबे, राष्ट्रवादी काँग्रेसकडून शहराध्यक्ष सुनिल टिंगरे, सुभाष जगताप, राजलक्ष्मी भोसले, शिवसेना ठाकरे गटाकडून शहरप्रमुख गजानन थरकुडे, संजय मोरे, काँग्रेसचे शहराध्यक्ष अरविंद शिंदे, प्रदेश उपाध्यक्ष मोहन जोशी, माजी मंत्री रमेश बागवे, ॲड. अभय छाजेड उपस्थित होते. दोन्ही राष्ट्रवादीची चर्चा लांबली दोन्ही राष्ट्रवादी काॅग्रेस एकत्र येण्याचा निर्णय मंगळवारी दोन्ही पक्षांच्या पदाधिकाऱ्यांनी घेतला असला तरी बुधवारी या दोन्ही पक्षांची जागा वाटपाबाबतची कोणतीही चर्चा पुढे गेली नाही. इच्छुक उमेदवारांच्या मुलाखती तसेच पक्षाच्या संभाव्य जागांची यादी राष्ट्रवदी काॅग्रेस शरदचंद्र पवार पक्षाचे माजी शहराध्यक्ष प्रशांत जगताप यांनी केली होती. तसेच या बाबतची कागदपत्रे त्यांच्याकडेच होती. मात्र, मंगळवारी दिवसभर प्रशांत जगताप मुंबईत होते तर बुधवारी दिवसभर त्यांच्या राजीनाम्याच्या चर्चेनंतर त्यांनी रात्री राजीनामा दिला. त्यामुळे, ही माहिती जागा वाटपाच्या चर्चेसाठी नेमलेल्या पक्षाच्या पदाधिकाऱ्यांना मिळाली नाही. परिणामी, या पदाधिकाऱ्यांनी दिवसभर पक्ष कार्यालयात बसून पुन्हा एकदा ही माहिती तयार केली असून त्यानंतर आता उद्या जागांवर दोन्ही राष्ट्रवादीत चर्चा होणार असल्याचे सूत्रांकडून सांगण्यात आले.
