प्रभात वृत्तसेवा पुणे – भाजप पुण्यात शिवसेनेसोबत युती करणार असल्याचे मुख्यमंत्री देवेंद्र फडणवीस यांनी जाहीर करताना राष्ट्रवादी काँग्रेससोबत मैत्रीपूर्ण लढत होणार असल्याचे स्पष्ट केले आहे. त्यानंतर आता भाजप आमच्या माजी नगरसेवकांना पक्षात प्रवेश देत आहे, ही कसली मैत्री? असा सवाल राष्ट्रवादी काँग्रेस कार्यकर्ते करत आहेत. त्यामुळे पुण्यात राष्ट्रवादी काॅंग्रेस शरदचंद्र पवार पक्षाशी आघाडी करण्यास आमची काहीच हरकत नाही, अशी स्पष्ट भूमिका राष्ट्रवादी काॅंग्रेसच्या पदाधिकाऱ्यांनी प्रदेशाध्यक्ष सुनील तटकरे यांच्या समोर व्यक्त केली.महापालिका निवडणुकांच्या पार्श्वभूमीवर प्रदेशाध्यक्ष तटकरे यांनी राज्यातील सर्व जिल्हाध्यक्ष, शहराध्यक्ष तसेच प्रमुख पदाधिकाऱ्यांची बैठक घेतली. या बैठकीत पुण्यातील पदाधिकाऱ्यांनी दोन्ही राष्ट्रवादी एकत्र येण्यास सहमती दर्शविली. या बैठकीत तटकरे यांनी पुण्यातील पक्षाची स्थिती, स्वतंत्रपणे लढल्यास काय अडचणी असतील? किती जागांवर उमेदवार आहेत? किती जागा जिंकू? दोन्ही राष्ट्रवादी एकत्र येण्याबाबत स्थानिक पदाधिकाऱ्यांची काय भूमिका आहे यावर चर्चा केली. ही कसली मैत्रीपूर्ण लढत ? या बैठकीत शहर राष्ट्रवादीने भाजपच्या भूमिकेवर थेट आक्षेप व्यक्त केला. भाजप शिवसेनासोबत असली तरी राष्ट्रवादीचे उमेदवार पळविले जात आहे. अशा स्थितीत मैत्रीपूर्ण लढत होण्याऐवजी दोन्ही राष्ट्रवादी एकत्र आल्यास अथवा इतर समविचारी पक्षांना एकत्र घेतल्यास पक्षाला फायदा होणार आहे. त्यामुळे त्याबाबत सकारात्मक विचार व्हावा, अशी मागणीही करण्यात आली. ७११ इच्छुकांचे अर्ज राष्ट्रवादी काँग्रेसकडून अर्ज स्वीकारण्यास मुदतवाढ देण्यात आली होती. त्यानंतर शुक्रवारी अखेरच्या दिवशी पक्षाकडे सुमारे ७११ इच्छुक उमेदवारांनी अर्ज दाखल केले. दाखल अर्जांच्या मुलाखती लवकरच उपमुख्यमंत्री अजित पवार यांच्या उपस्थितीत घेण्यात येणार असून, त्यानंतर अंतिम उमेदवार यादी जाहीर केली जाईल, अशी माहिती राष्ट्रवादी काँग्रेस पार्टीचे प्रसिद्धी प्रमुख बाबासाहेब पाटील यांनी दिली.
